Geschdern hemmer mol widder e Wedder ghatt, des war scho koi Wedder meh, des war meh e U’wedder. Wie bei unserm Nochber d Feierwehr gschdanne isch zum Keller ausbumbe, binne uf die Idee zu komme, a mol in unsern Keller zu gugge.
Un was war?
Des war gewissermaße en Schlag ins Wasser. Des isch nämlich a bei uns nei’gloffe un hat dezu g’führt dass mir eine Bsonderhoit aus der dausend-un-zwoide Nacht im Keller g’hatt hen. War’s nämlich in dausend-un-oiner Nacht noch en fliegender Debbich, so hen mir in sellere Nacht en schwimmender Debbich g’hatt.
Zu dem Thema basst jo grad des Gedicht vom Sommergwidder, mit dem ich vor 3 Johr (2003) en Mundartpreis in de Schbarte „Lyrik“ beim „Arbeitskreis Heimatpflege Regierungspräsidium Karlsruhe e.V.“ griegt heb. Achdung, do kommts:
Noch em Sommergwidder
Noch em Sommergwidder
isch die Luft so frisch
wie wenn sich de Dag
e Pfefferminzguzl neigschowe hätt.
Die Beem hen ihre Blädder
zum Drickle uffghenkt.
Von do tropfts runner uff de Bodde
wo d Amoise um d Lache Slalom laafe.
Die Blume glänze wie frisch abgschdaabt
un die Hummle un Biene
sause uffgregt um se rum,
weil des Uwedder schließlich
von ihre Zeit abgange isch.
Die Moise iewe widder Diefflug
un die freche Schbatze
hogge immer noch
em Salatbeet.
Die hen sich nettemol vom Rege
schdehre lasse.
De Nochbershund hat a widder naus derft
un mei Fraa ruft aus em Keller ruff:
Heer jetzt emol uf mit dichte
un bring de Oimer
un de Butzlumbe runner.
Hettsch vorher gscheid abdicht,
hette mer jetzt koi Wasser em Keller!“
(© Roland Bruchmann, 2003)
