Nach längerer Zeit mol widder e Lebenszoiche. Die Alt-Neereder Schul exischdiert noch un wirkt weider im Schdille. s Ergebnis kammer am Samschdag, achzehnde elfde, ab em siwwene oweds im Gemoindehaus Neeret zu höre griege. swerd beschdimmt widder intressant, zumol mir an dem Owed a zwoi Üwerraschungsgäschd präsentiere werre: De Boris un d Uschi.
Wer koi Zeit hat zum Komme, verbasst halt en echde Mundart-Iwent (wie’s uf neideitsch hoißt).
Zur Not könne mer dann bloß uf unser Rubrik „Lernmaterial“ verweise.
Ach ja, e kloins Gedichtle wille a widder dezu setze. Des isch so e halwes Weihnachtsgedicht, oigentlich meh e Adventsgedicht. Dodefor hats letschtjohr de zwoide Preis im Lyrik-Wettbewerb von de Karlsruher Lideradur-Zeidung „raumK“ gewwe:
Engel
Engel fliege dorch d Schdadt,
lautlos, u’sichtbar.
Koi Mensch en dem vorweihnachtliche,
g‘schenkpaketbeladene
Passandeg’wimmel
merkt ebbes.
Awer Jeder, wo von eme Flügelschlag
gschdroift werd,
hat plötzlich e Leuchte em G’sicht
un schdrahlt von Inne her
wie wanner selwer
Fliegel kriegt het.
Ja,
so schdelle mers manchmol vor,
wanne me an so eme Advents-Eikaafsamschdag
uf de Koiserschdrohß
dorch d Fußgängerzon‘
schiewe lass.
Bletzlich,
korz bevor e abheb
mit meine Fliegel,
schrillt e Glock hinner mer
dass mers schiergar
‘s Drommelfell verreisst.
Um e Hoor het me
d Schdrohßebah
gschdroift.
So, des langt widder for heit. Also, mer sieht sich am Samschdag.
Übrichens, am Mundart-Owed gibts a was zum Trinke. Mir hawe uns extra e Cocktail-Rezept für den Owed üwerlegt: „Alt-Neereder Schulspeisung“.
Wenn de Owed rum isch un unser Cocktail gut akomme isch, werre mer des Rezept dann a mol do bekannt gewwe.
Adschee bis nägscht Woch
de Roland
