Zwoi Woche nach unserm 3. Neereder Mundart-Owed (ihr wisset jo alle noch: 3. November, 19.00 Uhr im Evang. Gemeindehaus Neureut-Nord) gibt’s schon widder e kulturelles Highlight in Karlsruh.
Nämlich die 25. Karlsruher Bücherschau vom 16. November bis 9. Dezember 2007 im Regierungspräsidium Karlsruh in de Karl-Friedrich-Schdrohß 17. Geöffent isch jeden Dag von morjeds em Zehne bis oweds em Achde. Was dort im Oinzelne gebode werd, kammer unner „http://www.buecherschau.de/html/uebersicht.html“ im Internet nochlese. Es gibt a e Bücherschau-Telefon, wo mer sich unner (0721) 926 40 59 weidere Informatione gewwe lasse kann.
Warum ich des jetzt alles do nei schreib? Ganz oifach: Die Veranschdalder wolle im Rahme von de diesjähriche Bücherschau a de ortsa’sässiche Karlsruher Autore (fascht hädde g’sagt: de Eingeborene) Glegehoit biete, sich mit ihre Werke de broide Öffentlichkoit zu präsendiere. Deshalb werre a mir von de „Alt-Neereder Schul“ dort verdrede sei un unsern bisheriche goischdiche „Output“ (unser zwoi Live-Doppel-CD’s vom erschde un vom zwoide Mundart-Owed un unser gemoinsames Biechle „Schwätze wie de Schnawwl g’wachse isch“) dort vorschdelle.
Kaafe kammer die Dinger üwer uns (Näheres findt mer do im Blog unner de Rubrik „Lernmaterial“) odder bei unserm Kooperationspartner, der Druckerei Berenz in Karlsruh in de Waldschdrohß 8.
Wer also noch e scheenes, originelles Weihnachtsgschenkle für en Liebhaber von unsere Mundart sucht, kann sich jo üwer unser Sache entwedder an unserm nägschde Mundart-Owed odder uf de Karlsruhe Bücherschau bequem informiere. Glänziche Auge bei dem odder der Beschenkte sin garandiert 
Also, bis demnägschd un
Adschee
sagt de Roland
PS: ’s nägscht mol gebt’s a widder e Gedichtle do im Blog. Verschbroche!!!
