Um eich des Wörtle richdich erkläre zu könne, müsse mer uns erscht mitnanner e Schtück in die Neereder Vergangehoit zrückversetze. Domols, zu Zeide, bevor die erschde Flüchtling nach Neeret komme sin un ihre Tomade, de Babrika un de Knowlich mitbrocht hen, hat’s in Neeret –so isch’s von de Altvordere verzehlt worre- bloß zwoi Gewürze gewwe: Salz un koi Salz. Un wenn von dem erschde zuviel dren war in de Supp odder in de Hausmacher Worscht, dann hat mer gsagt „au, isch die awer hannich heit“.
Des „hannich“ besagt, dass die betreffende Schbeise schlicht un oifach versalze isch.
Awer des kann a sei positive Aschbekte hawwe. Zum oine kammer draus schließe, dass die Köchin frisch verliebt isch –was an un für sich a immer ebbes Schön’s isch- un zum annere gibt’s en rechde Dorscht, un der isch jo a net zu verachde, wammer gnunk zum Trinke hat.
Uf des na wille jetzt (wie verschbroche) grad noch e kloins Gedichtle her setze, e paar Verslen wo mer zu dem Thema ei’gfalle sin. Des isch so e richdiches Kabinett-Schtückle, un wenn der’s erscht oweds nach de Zehne agugget, isch’s sogar e Schbätlese unner dem Motto: „Es isch nicht gut, dass der Mensch allein sei, wenn er ebbes zu Trinke hat“
Wei’- Weishoide
Wer selwer Wei’ trinkt un Wasser predicht,
der isch for mich erledicht.
Wer awer Wei’ trinkt un mich ei’lade duht,
den finne gut.
Die beschde Gschbräche gebt’s mitunder
bei’me Gläsle Schbätburgunder.
Hen’der von dem dehoim noch e Kist’,
wisse der, was der mache müsst!!!
Adschee bis zum nägschde mol sagt
de Roland
(wo uf eier Ei’ladung wart’) 
