Sonnewerwele (zum Zwoide; un e Rezept)

Ja, mit de Sonnewerwele binne doch net so schnell durch wie e z’erscht gmoint heb. De Karlheinz hat mer noch a’gmerkt, dass mer die Sonnewerwele vor em A’mache immer gründlichscht!  wäsche soll, weil mer sonscht nämlich beim Esse e Sandgrieb in de Gosch hat un de Martin hat mer noch e weidere Bezoichnung für die Sonnewerwele g’liffert -un des beziegt sich u’middlbar uf die Aussag vom Karlheinz- er nennten nämlich a gern „Gnarfelsalat“, weil’s beim Esse immer so zwischer de Zähn gnarfelt.

Dass die Schweizer zu de Sonnewerwele „Nüsslisalat“ sare un dass a die Bezoichnung „Mause-Öhrlen“ geläufich isch, hawe mitllerweile a mitkriegt.

’s Oinzichscht was jetzt noch fehlt isch e Rezept . Un des geht so:

 „Sonnewerwele-Salat á la Alt-Neereder Schul“ 

Für uns viere rechne mer

200 g Sonnewerwele

100 g Schbeck (in Werfl gschnidde)

100 g ausg’lösde Neereder Walnuss-Kern

4 Salatgrombiere („Belana“ odder „Selma“), middlere Greeße

4 kochde Oier (zwoi un zwoi in oinere Roih J)

4 Knowwlich-Zehe

2 kloine Zwiwwle (Schalodde)

Essich (wenn’s geht, nemmt mer Walnuss-Essich)

Öl (Kürbiskern- odder Trauwekernöl)

Pfeffer un Salz aus de Mühl

Die Grombiere un die Oier duht mer (getrennt vonenanner) abkoche un de Schbeck un die kloigschniddene Zwiwwle schee glasich a’brode. Die Sonnewerwele werre gründlichscht! (s.o.) g’wäsche, en de Salatschleider drogge g’schleidert un uf vier diefe Deller verdoilt. In jeden Deller werd oin Knowwlich-Zehe dorch d Knowwlich-Press neigedrickt. Die kochde Grombiere un die Oier werre gschält, in mundgerechte Schdicker gschnidde un zsamme mit dem a’gebrodene Schbeck un de Zwiwwle noch warm uf die vier Sonnewerwele-Deller verdoilt. Öl un Essich im Verhältnis drei zu oins mische, mit Pfeffer un Salz abschmecke un üwer de Salat gewwe. Zum Schluss komme noch die Nüss, wo mer in de Zwischezeit in de Schbeck-Zwiwwl-Pfann a’gröschded hat, owwedrüwer. Dezu gebt’s leicht getoaschdedes Sonneblumebrot (wer’s vertragt kann sich a Budder druf schdreiche, wer’s net vertragt muss halt de Budder schdreiche) un en gepflegde badische Ochserohr (gschriwwe werd des Auxerrois), zum Beischbiel en „Jöhlinger Hasensprung“ aus Wengerde (Winzergenossenschaft Weingarten).

En gude Abbedid wünscht eich

de Roland

Sonnewerwele (Neereder Kompendium, Doil 15)

Alleweil, wenn’s drauße widder so herbschdlich drieb isch, froit mer sich üwer jedes Zipfele, wo mer von de Sonn noch erhasche kann. Die Sonn selwer kann ich eich loider net biede, awer devor en Exkurs (fascht hädde gschriwwe: „Esskurs“) üwer „Sonnewerwele“. So sagt mer in Neeret zum Acker- odder Feldsalat, Rapunzel hoißt er als a odder in Öschdreich sogar „Vogerlsalat“. Bsonners gut hat uns der gschmeckt, wannen unser Mudder gmacht hat zu Grombierekuggle (Kartoffelklösse) – awer net bloß aus Grombiere, do war a noch Mehl mit dren, so en ähnlicher Doig wie bei de „Buweschbitzle“ (Schupfnudeln) – un en Sauerbrode odder e Gulasch mit ere scheene braune sämiche Soß, do laaft mer scho währendem Schreiwe widder s Wasser em Mund zsamme (gell, Martin!).

Bevor der jetzt alle zu gut druf send un bloß noch ans Esse denket, musse eich mit eme kloine Herbschtgedichtle glei widder runner hole:

 Herbscht

Bisses morjeds hell werd dauerts täglich länger.

De Regescherm isch Pflichtprogramm for Wand’rer un Fußgänger.

De Newwel legt sich oim uf’s Gmüt un uf die Audoscheiwe,

mer sieht net wasdse jetzt in de Allee’e dreiwe.

Nauszus geht’s midm Johr un mit so manchem Lewe,

dem mir dann ’s ledschde G’loid zum Gottsagger naus gewe.

Koi Bläddle meh hengd an de Boim.

Dunkl werds im Aldershoim.

Des war’s widder for heit. Odder wie ’s de Udo Wolff von der bekannde deutsche Blues-Band „Das Dritte Ohr“ (http://www.das-dritte-ohr.info/index.html Motto: Wetterfester Blues mit deutschen Texten) am End von ihre Konzerde nach de ledschde Zugab ausdrückt: „Vielen Dank, tschüss und noch ein schönes Rest-Leben“!

In dem Sinn also Adschee bis zum nägschde mol

sagt

de Roland