was die Alt-Neereder Schul so zu verzehle hat? Wer net des Glück ghatt hat, bei unserem (ausverkaafde) „3. Neereder Mundart-Owed debei zu sei, kann sich des jetzt alles als „Live“-Mitschnitt a’höre. Un die wo debei ware un sich’s noch emol neiziege welle, könne des mit unsere neie Doppel-CD mache sooft se wolle. ’s isch alles druf un ich glab mer kann ganz gut ebbes von denne magische Momente un der ganz b’sonnere Atmosphäre schbüre, die an dem Owed im Neereder Gemoindehaus g’herrscht hat.
Zusammefassend hoißt des: Die neue CD von de Alt-Neereder Schul isch ferdich un mer kann sare, sie isch widder gut worre. Insgesamt hen die zwoi CD’s e Dauer von ca. 140 unnerhaltsame Minudde, die mol luschdich un mol nochdenklich, awwer nie langweilich sin.
Do trefft sich’s a gut, dass mol widder Weihnachde vor de Dier schdeht un des oine odder annere Gschenkle gebraucht werd. Wie der do dra komme könnet, sehet der im Blog unner der Rubrik „Lernmaterial (Hausaufgaben)“.
Ansonschde gebt’s im Moment net viel Nei’s zu berichde. Abg’sehe vom übliche vorweihnachtliche Trubel (wo bei uns jetzt a noch die CD-Produktion dezu kommt) laaft alles sein normale Gang. Un des Wedder hat jo a noch vier Woche Zeit um sich e bissle meh uf Weihnachde eizuschdimme. Awer bis dort na höret der bschdimmt widder ebbes von mer un dann gebts a widder e Feschddags-Gedichtle un e Fortsetzung von unserm Kompendium.
Adschee sagt
de Roland
