De Vorverkauf isch zwischezeitlich agloffe un macht sich ganz gut. For die wo noch u’entschlosse sin (odder for die Annere, wo e bissle neigierich sin -gell, Erich-) gebt’s jetzt noch e korze Inhalts-A’gab von dem Schdückle:
De Paul hat’s net leicht. Als elloi lewender Junggsell hadder schdändich Schtress mit seinere paforschde Haushaltshilf, de Inge. Zur Abwechslung schbielder als gern emol en richdicher Männer-Skat mit seine Kumbels, em Bruno, em Willi un em Hans.
Zu allem U’glück hat sich a noch sei Erbdande Isolde zu’eme 2wöchige Bsuch a’gmeldt, weil in derre Zeit ihre Wohnung renoviert werre soll. Des isch for de Paul e echdes Problem, weil er seinere Dande e richdiches Familielewe mit Fraa un drei Döchder vorg’schwindelt hat um uf die Art zu’eme vorgezogene Erbausgleich zu komme, was ufgrund von dodrufna erfolgte regelmäßiche Zuschüss von de Dande zu Hochzich, Kindsdorfede, Aussschdeier un so fort a ganz gut glabbt ghat hat.
Jetz isch nadierlich guder Rat deier. Die Dande soll morje scho komme un de Paul hat koi Familie vorzuweise.
Nochfroge bei de Inge und de Beate –des isch die Fraa von seim Kumbel Bruno- quasi als „Leasing-G’schäft“ for 2 Woche die offene Schdell als em Paul sei Ehefraa zu üwernemme, bringe loider net des g’wünschde Ergebnis. A de Hans, de jüngschde von seine Skatfreind, möcht uf den Vorschlag, dass er vorüwergehend ’s G’schlecht wechsle und sich als Pauls „Fraa“ de Dande bräsendiere soll, net ei’geh.
Dann ischer do, der Dag, wo die Dande kommt. De Paul versucht gschwin’ noch emol, die Beate dorch e höchere Leasing-Rate von ihrem „Eheglück“ zu üwerzeige. Desmol glabbts un er bringt se in sei Wohnung, bevor er die Dande vom Bahhof abhole will. Awer was muss er do erlewe? Die Dande isch frieher komme wie gedenkt und isch derweil scho von seinere „Ehefraa“ Inge empfange worre. Awer des isch erscht de A’fang! Nooch un nooch erscheine a noch die „schwarz Hannelore“ un die „sieße Wilma“ un behaupde alle, em Paul sei rechtmäßiche Ehefraue zu sei.
Schließlich kommt a noch de Dande Isolde ihre Vermögensberaterin, die Frau Felicitas Merz-Aster direkt von de Frankfurter Börse, weil se dringend ebbes Wichdiches mit de Dande Isolde beschbreche muss.
Wie sich des alles zum Schluss ufleest, wille do jetzt net verrohde, bloß so viel wille noch sare: ’s gebt for oiniche von dennne bedoilichde Persone durchaus so ebbes wie e „happy end“. Zumindescht for eich als Zuschauer werd’s so sei, wenn der eich des „Drama“ agugget. Ich hoff bloß, dir hend dann alle d Daschediecher debei, wenn’s hoißt
„Bühne frei für ’s Erbdande-Drama“
Viel Vergniege wünscht eich
de Roland 
