Jetzt isch se widder do, die schöne Schbargelzeit. Uf de Ägger im Umland sieht mer üwerahl d Leit in gebückter Haldung Richdung Oschde (des isch do, wo die Moischde vonene a herkomme, quasi als „die Weiße’ ausem Morge’land“) Löcher in de Bodde grawe un die arme, u’schuldich weiße Schbargle gnade’los abschdeche. Die U’tat werd awer net vor Gericht verhandelt sondern als Gericht vor die Feinschmecker im Land uf de Disch gschdellt. Die Variande sin’ vielfäldich –sei’s als, Supp, Salat odder Beilag zu Pfannekuche mit Holländersoß, Kottlett mit neie Grombiere, Schinke, Lachs odder was es sonscht noch alles gebt, gedünschdet, gebrode odder gegrillt- awer des Urdoil isch immer oischdimmich: „Delikat!“
Die Schbargle nennt mer jo a des „königliche Gemüse“, desszweg muss, wemmer e Gedicht drüwer mache will, des Gedicht entschbrechend sei. Un was oignet sich do besser als e Ode!
Schbargle schmecke prima,
Schbargle sin g’sund.
Do griegsch bei unserm Klima
uffs Kilo zwoi Pfund.
(also, wie der sehet, de Vierzeiler isch’s net!)
O Schbargel (Ode an de Schbargel)
O Schbargel!
Der Gemüse edelschtes,
weißes Gold der Hardt,
der du des ganze Frühjohr
mit göttlichem Glanz üwerschdrahlsch,
wie immer a des Wedder vorher war,
sei uns willkomme!
Hat dich net unser himmlischer Vadder,
sellemols, bei de Vertreiwung ausem Paradies,
dem Adam mitgewe
als Zoiche der Versöhnung,
als innerliche Verhoißung an all die
Herrlichkoide,
wo dermaloinscht uf uns warde,
wenn mir zwische Frohlocke’
un Halleluja-Singe
uns an sein Disch setze derfe
unner blühende Apfel- un Pflaume-Beem,
ewich.
Siehsch, Schbargel,
sag selwer,
wie kann mer annerscht,
als vor dir zu kniee,
in Demut dich zu ernde,
un in Verzückung verzehre.
Amen (äh, des soll hoiße: Gude Abbedid)
wünscht eich
de Roland 
