Jetzt isch de Mooi scho halwer rum, awer ich heb bis jetzt noch koiner fliege sehe. Ich mecht grad wisse, was die em Hardtwald bekempfe mechde. Odder isch des vielleicht des Ergebnis devo? Also ich moin halt oifach, ohne Mooiekeffer fehlt ebbes um die Johreszeit.
Wanne noch dra denk, wie mir als Kinner frieher oweds bei denne Buchehegge vom alde Friedhof, des hoißt, domols wars noch „de Friedhof“ weil’s unsern „neie“ Hauptfriedhof noch net gewwe hat, Mooiekeffer en masse gfange hen.
Die hasch grad midem Fedderballschläger runnerdatsche brauche. Dann hasch se in eme Schächdele, wo d vorher e paar Luftlöcher in de Deggl gmacht hasch un e paar frische Bläddlen nei als Fuhder, schdändich em Hossesack umenanner gschloift.
Odder hasch se dehoim üwer de Zaun gschmisse en de Hiehnerhof un hasch zuguggt, wie die Hiehner iwer die Keffer herg’falle sin. For die isch des so e Art Leibschbeis gwest, wie bei uns Sauerbrode un Grombierekuggle von de Mudder odder ihre selwer g’machde Mauldesche.
Bloß hasch de dodebei net von de Großmudder verwische lasse derfe, sonscht hat se de dachdld. Un alles wegger de Ooier. Weil, wenn die Hiehner so viel Mooiekeffer gfresse hen, hen hinnenooch die Ooier a noch nach Mooiekeffer gschmeckt. Des hoißt, gschmeckt hen se nort nemmeh. Manchmol hasch dann als a noch en Kefferfliggl oddder en Fiehler eneme Ooi dren gfunne.
Hiehner hen mer scho lang koine meh un so wie’s ausseht ischs mit de Mooiekeffer des Johr a Essich. Jetzt hoißt’s halt geduldich sei, vielleicht sehe mer jo in vier Woche dann em Mooiekeffer sei kloine Briederlen: Die Juni-Keffer.
Awer bis dort na sare eich jetzt erscht emol widder
Adschee
(un noch viele scheene Owende uf Terrasse un Balkone bei eme gekühlde Getränk – un loider ohne Mooiekeffer).
Eier Roland 
