Wenn mer des Wörtle „vermeewld“ ins Hochdeitsche üwersetze will, dann könnt des vieelleicht „vermöbelt“ hoiße, awer des treffds net so ganz. Unner „vermöbelt“ schdellt mer sich beischbielsweis e Wohnung vor, wo so vollgschdellt isch, dass mer sich dren net riehre kann. Wenn de Neereder sagt „vermeewld“ moinder ebbes ganz annerschts. So wie am Sonndag owed, wo mer bei dem scheene Wedder noch gmiedlich drauße ghoggt sin em Biergarde beim Idaljener. Dodebei hemmer uns drüwer unnerhalde, wie die Russe bei de EM im Verdelfinale die Holländer vermeewld hen. Selle hen en dem Schbiel nämlich ganz schee verrosst, was so viel hoißt wie sie hen oine uff d Kapp griegt. Des isch „vermeewld“ im Neereder Schbrochgebrauch. Beim Zahle isch dann de Mario fascht net beikomme, weil er drin vor de Großleinwand zugugge wollt, wie die Idaljener die Schbanier vermeeble. Un wie des ausgange isch wisse mer jo inzwische a.
Am annere Morje hewe dann feschdgschdellt, dassdse mich an dem Owed a ganz schee vermeewld hen. Die Schnooge nämlich. Iwerahl an de Ärm un de Fieß hasch die rode Blatscher gsehe un gjuckt hats wie bleed. Un des isch a vermeewld. Alleweil hats scheints midem Schbritze net so viel gnutzt wie vor e paar Johr, wo e do sogar mol e Gedicht driwwer gschriwwe heb. Welle der’s heere? Also gut, ich schreibs do unne na. Awer laut vorlese, sonscht wirkts net.
Neereder Sommer anno zwoi
Glückliche Momende an de frische Luft.
Ufem Fahrrad ohne Helm
gmiedlich
vor sich na rolle.
Mit zärdliche Finger wiehlt
de laue Sommerwin’
em schüddere Reschthoor
un weit un broit
koi oinziche Schnoog!
Newwer mir drebbld lächelnd
mei Vanilleis-Göttin.
Was laaft?
Komm, fahre mer hinnere
en de Rheiwal’,
Liparol-Film gugge.
So, des muss for heit widder lange.
Adschee bis zum nägschde mol sagt de
Roland 
