Ich heb eich jo s letschd mol e Gedicht verschbroche. Mol gugge, ob eich des zusagt.
Geschdern owed hewe denkt, weil doch Sommer isch, esch halt en Salat. Nort hewe mol gsichdet, was noch alles dehoim war, un rauskomme isch dann en
Griener Weißworscht-Salat á la Romana
Un der geht so:
Romana-Salatherze butze, wäsche un trocke schleidere. E Salatsößle a’riehre aus sießem Senf, do kammer ruhich en orndliche Hieb nemme (des muss koin Händlmayer sei, ich heb en selwer g’machder g’hat wo mer mol gschenkt griegt hen), Olive-Öl, Ungarisches Pußta-Öl mit Piri-Piri, Dattel-Balsam, Accetto Balsamico, Pfeffer un Salz aus de Miehl und alles gut vermische. En de Zwischezeit die Weißwärscht im hoiße Wasser (s derf nemmeh koche) ziege lasse. Jetzt de Salat in e scheene Schissel (das Auge isst mit!), die Salatsoß driwwer un alles gut dorchenanner mache. Die hoiße Weißwärscht enthäute un in Scheiwe schnibble. Die komme dann zum Salat un werre a noch mit dorchenanner g’mischelt.
Des war’s oigentlich schon gwest. Do kammer dann noch dezu die oind odder anner Brezel esse (wer noch ebbes für sei G’sundhoit duh will, kann a noch Budder druf schmiere) un des oind odder anner Hefewoize trinke.
Ich kann eich sare, des isch e Gedicht ….
Übrichens: Echde Gedichte gebt’s zum Beischbiel am Samschdag, 23. Auguscht ab de Neine oweds im „Eggschdoiner Gockel“. Do schbielt de Rudi Banghard mol widder sein Country un Blues un mir sorje für’s mundartlich-literarische Niveau debei. Ich heb a noch extra en „Neereder Blues“ gschriwwe un wenn sich de Rudi den bis zu dem Samschdag druf schaffe kann, werdern do –sozusare als Premiere- vortrare.
Also!! Net verbasse!!
Adschee bis dort na sagt
de Roland 
