Vorschau uf de Mundart-Owed

Liewe Leit, bal ischs widder so weit un unser nägschder Mundart-Owed schteht ufem Programm. ’s isch mittlerweile scho zum vierde Mol, dass mir zu so eme Owed eilade un mir hedde uns des nie denkt, dass des emol so Ausmaße a’nemmt. Um so meh froits uns, dass eich unser Sache so gut gfalle hen, dass der immer widder kommet. Un weil jedesmol a e paar neie Leit dezu komme, werds a von mol zu mol voller. Desjohr werds wahrscheins bsonners knapp werre mit de Plätz, weil weger de Kerche-Renovierung de Gottesdienscht Sonndags immer em Gemoindehaus abghalde werd un desszweg schdändich e Orgel drin schdeht un a annere Sache wo immer gebraucht werre, so dass mer net so viel Schdühl schdelle könne wie üblich. Es empfehlt sich also, sich sei Karde em Vorverkauf zu besorge. Die Frau Kastner, de Herr Molnar uns Schunders vom Musiklädle dehde sich –genau wie mir a- üwer en rege Bsuch bschdimmt froie.

Als Ei’schdimmung gebts do unne dra zwoi Verslen aus meim Begrüßungsgedicht. De Rescht vom Programm schteht em Große un Ganze a schon, so dass mer sare könne mir froie uns uf de achde November un nadierlich a uf eich.

…

Heit welle mer widder Alt-Neereder Schulschtund halde.

Des isch for die Junge ebbes un for die Alde

un a die zwischedren komme uf ihr Koschde,

ehb dass am End noch die Zwerchfell afange roschde.

Mir hen widder so Manches gsehe un g’hört,

wo mer denkt hen, des ischs Ufschreiwe wert.

Wenns eich gfallt un ihr duhnt klatsche un lache

Isch des en Anschborn für uns um weiderzumache.

…

Adschee bis dort na

sagt

de Roland

Mundart-Owed

So, liewe Leit, jetzt isch unser Kinnergarde-Lesung a scho widder rum. Die Loiderin vom Kinnergarde, die Frau Eberlein, hat sich noch emol bedankt bei uns un hat dodebei gsagt, dass an dem Owed ca. 300 bis 350 Euro als Reinerlös hänge bliwwe sin. Ganz genau woiß ses no net, weil se noch net alle Rechnunge ghat hat. Uf jeden Fall hat sich’s rendierd, sowohl für de Kinnergarde als a für die Leit wo do ware. Uns von de Alt-Neereder Schul un unserm musikalische Begloider, em Rudi Banghard mit seinere senationelle bluesiche Gidahr hats an dem Owed a mordsmäßich Schbaß gmacht, bsonners weil halt a s Publikum so mitgange isch. Desszweg muss es a net s letscht Mol gwest sei, dass mir in dem Kinnergarde ufgedredde sin. Des Ambiente isch toll un de Zwiwwlkuche un de neie Wei ware a net schlecht.

Awer richde mer de Blick vorwärts un gugge uf unsern kommende, mitterweile 4., Mundart-Owed im Gemoindehaus Neureut-Nord. Der isch beroits am 8. November un do hemmer a widder Verschdärkung aus Eggschdoi debei, weil d Uschi Erndwein widder mitmacht. Mir sin gschbannt, wasdse desmol zu verzehle hat. Wenn alles glabbt, hemmer a noch en annerer Gascht, nämlich de Alexander Entzminger (http://www.we-web4u.de/entzuendlich/index.html). Der kommt aus de Pfalz, awer des heert mer fascht nemmeh, weil er schon e ganz Weile in Karlsruh wohnt.

De Vorverkauf an de übliche Schdelle laaft grad a, s koscht wie letschdes Johr 6 Euro un de Erlös isch wie jedes Johr for en gude Zweck beschdimmt. Nämlich for de CVJM, der diesmol die Bewirtung üwernemmt un for die Gemoindehausrenovierung (do hen mir halt a ebbes devo).

An dem Owed werre mer a unsern neie Kolenner für 2009 vorschdelle, den mer dann für siwwe-fuffzich glei mitnemme kann.

So, des wars widder for heit. Ich hoff, mer sieht sich.

Adschee bis dort na

sagt de Roland