’s isch zwar noch e bissle früh, weil jo heit erscht de dritt Advent isch, awer was willsch mache, wenn d’ e Vision hasch. Un so ischs nämlich die Däg em Martin gange, der mir sein Tegschd dann dankenswerterweis für de Blog zur Verfügung gschdellt hat. Jetzt hat jo unsern Alt-Bundeskanzler Schmidt, quasi des „Räuchermännle der Nation“ emol gsagt, wemmer Visione hat, soll mer zum Dogder geh, awer den Tegschd wille eich grad in de Vorweihnachtszeit net vorenthalde. Un de Martin hat a schon fürs erschde Quardal en Termin bei seim Hausarzt. Name wille koiner nenne, awer so wie den gebts meh wie sechse.
Also, do kommt se jetzt: E Vision in Neered – von Martin Bruchmann
„Ihr Kinderlein kommet!
Ich heb mir emol vorgschdellt was heitzudags los wär wenn mar zu de Kinner sage deht: „Ihr Kinderlein kommet, o kommet doch all!“
Die dehde erscht e mol en Lachgrampf griege, weil mit so einer alde Aschbroch kenntschd die gar net dreffe, die dehde dich dodahl ignoriere, sich rumdrehe un am PC oder an de Playschdeischen weiderschpiele. Als Kinderlein derfsch die heitzdags nemme bezoichne, des sin’ jetzt Kids oder Girlies oder Boys, awer „Kinderlein“ sin’ des mit Sicherhoit koine me.
Un for die „Kids“ sin’ Event-Shows agsagt, mit allem was so dezu ghehrt.
Do kennt des hechschdens hoiße:
„Hey Kids ,ich hätt’ eich do en Event mit Country-Charakter Ambiende un eme animalische Beibrogramm zu biede. Eine Schtar-Light-Show üwer derre Event-Country-Hall isch a dabei. Als Chor hewwe absolud himmlische Popschtar-Engele zu biede, die eich de neischde Hit in eme Leif-Iwend performe. E Bänd mit Pauke, Trombede un Posaune vor de Pauer-Saund un a noch e paar Harfe vors Gfiehl dudle em Bäckgraund mit. Des isch jo scho absolut krass un häwwie, awer noch lang net alles.
Als absoluder Höhepunkt gibt’s en Nachwuchsschdar der sich zsamme mit seine zwoi Alde im Middelpunkt von derre ganze Veraschdaldung präsentiert. In einere aldernative Bobbekischd mit Original Öko-Unnerlag’ liegt der Jungschbund un lasst die ganze Huldigungen von seine Fäns un de Groupies an sich vorbei ziege, e Audogrammschdund isch vor en schbädere Zeitpunkt agsetzt.
Als Beiprogramm gebt’s dann noch e paar Original Panflöd’ schpielende Schofhirde mit wollproduzierende Vierfiessler als Folklore- tatsch. Ein kaschdrierdes Rindvieh un en grauer Jah-Sager sin’ als optische Beigab’ em Hinnergrund platziert!“
So, hen der des jetzt gschnallt?
Also Leit, do kanne eich bloß oins sare: Wenn a manche Leit moine, unser Mundart deht sich ahöre wie e Fremdschproch, dann lass ich doch liewer die „Kinderlein“ komme, bevor dasse mit de „Kids“ ab-chille muss.“
So, des war jetzt widder en Haufe Zeigs for heit. Un weil ich doch nochher noch lese muss bei de Seniore-Weihnachtsfeier wer’ ich oifach -eier Verschdändnis voraussetzend- des nägschde Kabiddl vom Neereder Kompendium mit dem „Käfderle“ ufs nägschd mol verschiewe (un wenn der Boris Becker domols gwüsst hätt’, was des isch, e „Käfderle“, hädder sein Bsuch dodrin vielleicht besser a verschowe).
En scheener dritter Advent wünscht eich de Roland
(un basset uf mit de Kerze!)
