Wiesengrund

Liewe Leit,
„im schönschten Wiesengrunde …“, do duht sich ebbes: „Wiesengrund“ isch nämlich de Titel von unserm neie Theaderschdück, „eine Idylle in drei Aufzügen mit einem Aufzug“. De Martin un ich hens mitnanner gschriwwe (unner Vernichdung oinicher Flasche Rotwei aus diverse Lage) un mir schbiele nadierlich a selwer widder mit, wenn des dann demnägscht üwwer d Bühn geht.
Mir schbiele widder im Gemoindehaus Nord in de Kirchfeldschdrohß 149 un zwar am Sonndag, 8. März um Fümfe (17.00 Uhr), am Samschdag, 14. März um Siwwene (19.00 Uhr) un noch emol am Sonndag, 15. März um Fümfe (17.00 Uhr). Saalöffnung isch jeweils e Schdunn vorher.
Karde gebts an de Owed-Kass, falls noch e paar üwrich sei sollde, awer sicherer ischs em Vorverkauf; wie immer in Neeret bei de Frau Kastner in de Alde Friedrichschdrohß, bei Schreibware-Molnar im Bäre’weg odder beim Musik-Lädle im „Zinke“ un in Eggschdoi beim Schreibware-Geigle in de Hauptschdrohß.
Vorbschdellunge üwer den Blog odder per E-Mail werre nadierlich a gern a’gnomme.
Die Karde koschde wie ledschd Johr a siwwe Euro für Erwachsene un fünf Euro für Kinner. Der Erlös geht widder ohne Abzug in die Jugend- un Seniorearboit von de Kerche-Gmoinde
Die Prowe laafe ganz gut -wegger derre Proberei hawwe in de ledschde Zeit a nemmeh so an dem Blog weiderschreiwe könne, awwer des macht sich alles widder- un wenn dir in de Ufführung halwer so viel lachet wie mir bei de Prowe, nord werds recht.
Üwer de Inhalt verzehle eich e anners mol e bissle meh, jetzt nur so viel: De namensgebende „Wiesengrund“ isch eine neu eröffnete „Senioren-Residenz“ im Zinke un die Bewohner un Mitarwoider dort hens alle fauschtdick hinner de Ohre. Mir entführe eich in dem Schtück uf die högschde Himalaya-Gipfel in das Reich des Yeti un ins diefschde Bermuda-Dreieck, wo die Gehoimnisse um de Pirade-Schatz vom Käptn Schwarzbart enthüllt werre.
Also, kommed nomme. Zum Esse un Trinke gebts a widder ebbes, wobei die Küche awwer wegger de Kerche-Renovierung un der desszweg eigschränkte Nutzung vom Gemoindehaus kalt bleiwe muss.

Uf eier zahlreiches Erscheine froit sich

de Roland

Winter im Januar

Ja, liewe Leit, ich hoff, dir hend s neie Johr alle gut a’gfange un ’s hat koi ernschdhafde Verletzunge gewe beim Feierwerk un Gliehwei’.  Erinnereder eich noch, was e ledschdes Johr im Januar gschriwwe heb? Üwer des warme Wedder un des neie Kohlekraftwerk? Un jetzt gugget, wie’s des Johr isch. Mir hen en richdicher Januar wie frieher un’s Kohlekraftwerk isch scho faschd ferdich. So kammer sich deische. Tja, erschdens kommt es anderscht …
Dodrüwwer heb ich dann diesmol e kloins Gedichtle gschriwwe, do unnedra könne der’s lese (vielleicht so, wie ich’s gschriwwe heb: mit eme kloine Augezwinkere

Winter im Januar
Des Johr ischs widder em Januar
So ganz annerscht, wie’s beischbielsweis ledschd Johr war,
do war’s warm, mir hen Hefewoize uf de Terrass’ getrunke
un dass e extra e neie Schneeschaufel kaaft heb, hat mer g’schdunke.
Do hat mer denkt, vielleicht hen se doch recht, die Griene,
wie se die Klimaerwärmung verkündt hen mit ernschde Miene.
Awer des Johr ischs widder en Winter wie in de alde Zeit,
wo’s kalt isch bis uf d Knoche un’s dagelang schneit.
Die verschneide Beem in Hardtwal’, des isch e Bild wie g’molt,
oi Glück hewe mer die nei Schneeschaufel ledscht Johr g’holt,
weil mit de alde wär’s nemmeh gange, die isch ziemlich em … End,
un wenn’s gfriert werd de Schnee doch zu Eis un Harsch!
Ja, liewe Grüne, des mit dem Klima isch vielleicht doch e bissl üwertribbe;
Un jetzt geh’ e naus, fünf Zendimeder Klimaerwärmung vom Gehweg schibbe!

Ganz klar, dass e dann nadierlich net weiderschreiwe kann, heit. Awer d Fortsetzung folgt. Verschbroche!!

Adschee bis dort na sagt

de Roland