Liewe Leit,
der Jubiläums-Mundartwettbewerb (25 Jahre Arbeitskreis Heimatpflege) „de gnitze Griffel“ isch jetzt entschiede. Die Jury hat ihr Urtoil gschbroche un a dieses Mol ware mir von de Alt-Neereder Schul widder vorne mit debei:
Ein dickes Lob hats gewe für em Karlheinz sein Wettbewerbsbeitrag un sogar en zwoider Preis (de „gnitze Griffel“ in silwer) in de Schbarte „Lyrik“ für mei Gedicht „Nooch em Klimawandel“. Dodrüwer hen mer uns nadierlich ganz arg gfroit un hen’s bloß bedauert, dass em Martin sein Beitrag net entschbrechend g’würdicht worre isch. Vielleicht hädder doch unsern OB in de Gondel lasse solle. Naja, des isch zwar e bissle schade, awer desszweg isch sei Gschicht trotzdem gut. Ihr könnt eich jo beim nägschde Mundart-Owed selwer devo iwerzeige.
Un der nägschde Mundart-Owed –des isch dann de fünfde, a schon e kloines Jubiläum- findt bekanntlicher Weis am 14. November widder im Gemoindehaus Nord schtatt. Vorher hedde der noch Glegehoit uns zu sehe (un zu höre) am 31. Okdower midm Rudi Banghard un de GROOVE ROOTS im Eggschdoiner Gockel odder bei unserm nägschde Sonndagmorjeds-Mundartfrühschobbe am 27. September um Elfe in de „Trauwe“ in Neeret bei de Renate.
Also, lend de Schorz waggle un kommet nar zahlreich. Mir dehde uns jedenfalls frooie
sagt
de Roland 
