Salbei-Nudle

Heit gebts emol widder e scheenes Rezept, for alle Vegetarier un die wo’s noch werre wölle. Die „Floischfresser“ könne sich jo noch e idaljehnischs Kalbsschnitzele dezu a‘brode, des geht glawe a ganz gut.

Awer von vorne. Mir hen en scheener Salbeibusch bei uns em Garde schdeh, wo mit seine aromadische, samdiche Blädder alleweil grad so um Ufmerksamkoit beddeld. Also hemmer denkt, du kommsch uns recht, un hen uns heit Salbei-Nudle kocht. Des geht so:

Beliebiche broide (odder a schmälere ) Nudle (mir hen „Fettuccine“ gnomme) im schbrudelnde Salzwasser abkoche, bissfescht, wie de Idaljehner sagt un warm schdelle.

In de Zwischezeit die Salbeiblädder aus em Garde (nor net schbare debei, des Zeig wachst jo widder noch) abwäsche, trocke dupfe un schee kloi verschneide. Imme Töpfle en orndlicher Schdich gude Budder schmelze lasse, en Schugger Olive-Öl dezu un leicht salze. Dann die verschniddene Salbei-Blädder nei un e bisle schmurgle lasse. Mit Gemüsebrüh ablösche (s isch wegger em „binde“) un mit Salz un Pfeffer abschmecke. Un des war’s dann a fascht scho widder, weil, jetzt kammer scho serviere, des hoißt, mir hen uns noch en scheener griener Salat dezu a’gmacht (jetzt derf mer jo widder) un wer will kann a noch e Baguette dezu naschdelle.

Jetzt noch die Nudle uf Deller verdoild, die Salbei-Budder-Oliveöl-Mischung drüwer gewe, e bissle frischer Parmesan drüwer g’riwwe un dann bloß noch genieße. Un des Ganze im Freie uf de Terrass mit eme scheene Fläschle Wengerder „Oxerohr“ (Auxerrois), was will mer meh.

En guhde Abbedid wünscht eich

de Roland (der grad noch so en scheener Salbei-Gschmack uf de Zung hat

Das weiße Gold der Hardt

Hen der’s scho g’merkt? ‘s gebt widder Schbargle. Un do derf nadierlich e neies Schbargel-Rezept net fehle. Des hemmer heit owed ausbrowiert un ich muss sare – echt schbitze!!!

Debei ischs ganz oifach (üwerhaupt wemmers so macht wie mir un beim Leicht in Eggschdoi glei gschälde Schbargle kaaft)

Also, man nehme: Pro Person ugfehr e Pfun Schbargle, wie’s halt grad ausgeht, un e paar Scheiwe Friehschdicks-Schbeck (uf Neideitsch: „Bacon“). Dann brauche der noch Budder, e guds Olive-Öl, en Keidel Parmesan-Käs un e Händlevoll frisch grewlder Kerbel.

Zwoi Pfanne werre uf de Herd gschdellt. In de oinde en Schdich Budder un en Schluck Olive-Öl erhitze. Do komme dann die Schbargle nei, gschält, in ca. 4 Zendimeder lange Schdücklen gschnitte, un wann se e bissle dicker sin a noch halbiert. Die werre jetzt schee agebrode –net zu lang, sonscht werre se detschich. Wenn die Schbargle dann soweit sin, duht mer in de annere Pfann ohne Fett die Schbeckscheiwe e bissle ageh lasse, grad so glasich, net zu arg knuschbrich. Ufem Deller a’richde, die Schbargelschdücker drüwer gewe, mit e bissle frisch gmahlenem Pfeffer un Salz (mir hen unser selwer agsetztes Orasche-Salz gnomme) würze un dann großzügich von dem Parmesan drüwer howwle. Zum Schluss noch de Kerbel drüwer gezeddeld –„das Auge isst mit“- un mit eme frische Baguette serviert. Ferdich!

Dodezu ghört nadierlich oifach a e guds Gläsle Weißwei, beischbielsweis der berühmde un beliebde Oxerohr aus Wengerde (awer es gebt a gude Pfälzer, wie mer neilich mol bei ere Prob feschdgschdellt hen).

Ihr könned awer a oifach dezu trinke was der wöllet, uns ischs gleich.

En guder Abbedid un

Adschee bis zum nägsche mol

sagt

de Roland

Loider isch de Urlaub rum

So, liewe Leit, jetzt simmer widder dehoim vom Urlaub. ’s war schee un mir hen viel gsehe un erlebt. Mir sin in Idalje gwest midm Martin un der hat uns unner annerem Venedich gezoigt wie de geborene „Cicerone“, was jo a koi Wunner isch, weil der jo schon x-mol dort war un jeden Kanal un jedes Gräwele perseenlich kennt.

Des hat mer so gut gfalle, do musse eich ubedingt e Gedicht drüwwer rei’schdelle. Weil sich bei mir awwer die dichderische „Blütenlese“ erscht so nooch un nooch rauskrischdallisiert, weich’e jetzt oifoch mol uf en Fremdautor aus (’s gebt jo a schließlich noch e paar annere Gude), der wo früher schon sei Ei’drück von Venedich uffs Babier gebrocht hat. Des Gedicht isch zwar scho fascht neinzich Johr alt, awer so viel geännert hat sich oigentlich net. Un verschregget net beim Lese, ’s isch nämlich uf hochdeitsch

 Meschuggitis

Ode an Venedig im modernsten Dichterstil

 Selbst wenn du total besommert, hochgethermometert bist,

Reise nach der Stadt im Süden, die die viellagunte ist!

Weile an den heil’gen Stätten, den so schön getizianten,

Zeugen der vergang’nen Zeiten, wo die Künstler noch titanten!

Sieh’ dich um auf jenem Platze, marmorfliesenflachgedielt,

der bemarkust an der Seite und davor bekampanilt,

Zum Palast, dem hochgetreppten, lenke deinen Schritt geschwind

Mit den weitgerühmten Mauern, die getintoretto’t sind;

Von dem Platz, dem ringshotelten und im Ost bekathedralten,

Wende dich, tief eingegondelt, zum Revier, dem vielkanalten.

Siehst du dort das Bauwerk schimmern, wo nach Hohenratverdikte

Der Gefangene vor Zeiten zum Verließe seufzerbrückte?

Siehst du dort die Hausfassade, hinter der Othello wohnte,

den die eifersücht’ge Liebe allzu sehr bedesdemonte?

Stark beeindruckt kehrst du wieder mit dem Abendlicht, dem späten,

Zum belichtreflexten Platze, dem so lieblich längscaféten,

Wo am Prokuratienfirste der verwöhnte Vogel nistet,

Wo der Boden, was kein Wunder, abends stark betaubenmistet.

Glaube mir, an keinem Orte hast du solche Impressionen,

Laß dir, Wandrer, deine Seele von Venedigs Reiz umzonen,

Laß dir deine Nervenstränge, die sonst im Berufe frohnden,

Von dem Venezianerhimmel übersonnen, übermonden,

Nimm ihn auf mit trunk’nem Auge, diesen holden Transparent-Ton,

laß dich gänzlich vervenedigern, lasse dich vercinquecento’n!

 Alexander Moszkowski (aus: „Fröhlicher Jammer. Zerrbilder und Schelmenstücke. Ein Vortrags-Brevier“, Berlin 1922)

Ich hoff, des Gedicht hat eich g’falle (die annere Sache von dem Moszkowski sin übrichens a net schlecht, falls der do mol dra kommet, ’s isch glawe alles vergriffe un högschdens noch em Antiquariat zu griege).

En scheene Dag wünscht eich

de Roland

Familie-Fescht usw.

Geschdern hemmer mol widder unserm David sein Gebortsdag gfeiert.

Alle wo könnt hen, hen sich versammelt, weil se gwisst hen, s gebt widder ebbes Gut’s.

Un so war’s jo dann an. Bevor’s midem Esse los gange isch –broide Nudle mit Soß un Schbießbrode vom Hartmut aus Eggschdoi, dezu noch griener Salat, geeler, simmer ufem Schessloh gsesse un hen Kanapees gfuddert (Blädderdoigschnegge mit Lachs un Kräuder – für des Rezept binne net zuschdändich, die hat mei Fraa gmacht) un dezu hemmer en Aperitiv gschlebbert nach eme neie Rezept von mir.

 

Ich heb den Cocktail Davids Schleuder-Traum(a) gedauft (weil jo de David oigentlich gar koin Alkohol trinkt), un weiler so gud gschmeckt hat –s isch alles ratzebutz weggebutzt worre- wille eich des Rezept nadierlich net vorenthalde.

 

Die Mischung beschdeht aus insgsamt 15 Doil un setzt sich wie folgt zsamme:

 

• 5 Doil Johannisbeerlikör
• 2 Doil Gin

un

• 8 Doil Oraschesaft

 werre gepflegt mitenanner zsammegschiddelt un in e Sektglas, verdels bis halwer voll, gfüllt. De Rescht vom Glas werd dann mit Sekt ufgfüllt un des Ganze a’dächdich genosse.

 

Also, wenn der wellt, könne deren nochmache un ewefalls genieße. Awer Vorsicht weggerem „Schleuder“-Traum(a)

 

sagt de Roland

E gud’s Nei’s

Liewe Leit, ich glab des isch jetzt zum ledschde mol im alde Johr, dass e me dohin im Blog zu Wort meld. Awer nar koi Angscht, negscht Johr geht’s widder weider im Tegscht. Do gebts dann widder neie alde Neereder Wörtlen, neie Schbrüch un neie Gedichtlen, halt grad so wie die ganz Zeit vorher a.

Do wille eich grad noche kloins Gschichdle verzehle vom ledschde Samschdagowed, do ware mer nämlich alle mitnanner Esse beim Mongole-Chines in Eggschdoi. Die ganz Familie-Bande, elf Mann hoch simmer do drin gsesse un hens Biffee gebutzt. Un schbäter, wo mer dann alle satt un zufriede ware un mit unsere chinesische Reis-Schdroh-Kolenner unnerm Arm em Ausgang zugschdrebt sin, hat uns do de Owerkellner d Dier ufghowe (scheinbar wars Trinkgeld hoch gnunk) un uns e guds Neijohr gwunsche, beziehungsweis, des was er dodrunner verschdanne hat. Weil er, wie alle Chinese, Schwierigkoide bei de Ausschbrach mit dem deitsche Buchschdawe „R“ hat, hat er uns fröhlich zugrufe: „Auf Wiedelsehn und ein gude Lutsch!“

Un dem isch nix meh hinzuzufüge. Also dann, adschee bis nägscht Johr

sagt

de Roland

(lutschet gut nei!)