Verschnupfter Frühschobbe

So, högschde Zeit, dass mol widder ebbes Neu’s erscheint. Es duht mer loid, awer ich bin krank gwest. Wie an me na’gfloge. Nach unserm Uftritt in München -was übrichens aus unserer Sicht en scheener Erfolg war (vielleicht sin em Martin sei Bilder was worre, dann könnt mer des oine odder annere a noch rei schdelle)- simmer am Sonndag owed, wo mer dann glücklich widder in Neeret ware, noch alle mitnanner in de Wertschaft gwest un hen e bissle gfeiert. Do hewe noch nix gmerkt. Am annere Morje ware uf oimol halwer hie. Oigentlich hewe en Arzttermin ghatt, weile noch Impfunge z’mache ghatt hätt, awer ich heb denkt in dem Zuschtand hat des koin Wert und heb dann beim Dogder agrufe um mein Termin krankhoitshalwer abzusare. Awer die hen scheints gmerkt, wie’s um me schteht un hen g’moint ich soll trotzdem komme. Un ’s End vom Lied war dann, dasse krank gschriwwe war und die ganz Zeit midm dicke Kopf dehoim rumg’hängt bin. Dass mers inzwische widder e bissle besser geht, kenne der an dem Gedicht unnedra ablese. For des hats scho widder g’langt.

Was isch des? Wenn ich schnauf,
do werd der Schnauf mir knapp
un wenn ich dauerlaufe duh,
langts net mol meh for’n Trab?

For des defor, do laaft mei Nas’
in schwere dicke Tropfe,
dass ich mer fascht ens Naseloch
en Bropfer nei könnt schdopfe.

Mei Auge träne, wanne huscht,
im Bruschtkorb dren duhts rassle,
ich hoff, bloß dass am End die Gschicht
mir net mein Uftritt duht vermassle

am Sonndag Morje früh um Elfe,
wenn mir im „Löwe“ in Neureut,
unsern Mundart-Frühschobbe abhalde.
Wenn der alle kämet, wär’s e Froid!

(PS: Es geht mer a schon besser
un ich bin do uf alle Fäll,
mit Dascheduch un Fiewermesser.
Also, bis dann, mer sieht sich, gell?!)

So, gschwätzt isch gnung (for heit), de Rescht verzehle eich am Sonndag.

Adschee bis dort na sagt
de Roland

Vermeewld (Neereder Kompendium, Doil 22)

Wenn mer des Wörtle „vermeewld“ ins Hochdeitsche üwersetze will, dann könnt des vieelleicht „vermöbelt“ hoiße, awer des treffds net so ganz. Unner „vermöbelt“ schdellt mer sich beischbielsweis e Wohnung vor, wo so vollgschdellt isch, dass mer sich dren net riehre kann. Wenn de Neereder sagt „vermeewld“ moinder ebbes ganz annerschts. So wie am Sonndag owed, wo mer bei dem scheene Wedder noch gmiedlich drauße ghoggt sin em Biergarde beim Idaljener. Dodebei hemmer uns drüwer unnerhalde, wie die Russe bei de EM im Verdelfinale die Holländer vermeewld hen. Selle hen en dem Schbiel nämlich ganz schee verrosst, was so viel hoißt wie sie hen oine uff d Kapp griegt. Des isch „vermeewld“ im Neereder Schbrochgebrauch. Beim Zahle isch dann de Mario fascht net beikomme, weil er drin vor de Großleinwand zugugge wollt, wie die Idaljener die Schbanier vermeeble. Un wie des ausgange isch wisse mer jo inzwische a.

Am annere Morje hewe dann feschdgschdellt, dassdse mich an dem Owed a ganz schee vermeewld hen. Die Schnooge nämlich. Iwerahl an de Ärm un de Fieß hasch die rode Blatscher gsehe un gjuckt hats wie bleed. Un des isch a vermeewld. Alleweil hats scheints midem Schbritze net so viel gnutzt wie vor e paar Johr, wo e do sogar mol e Gedicht driwwer gschriwwe heb. Welle der’s heere? Also gut, ich schreibs do unne na. Awer laut vorlese, sonscht wirkts net.

Neereder Sommer anno zwoi

Glückliche Momende an de frische Luft.

Ufem Fahrrad ohne Helm

gmiedlich

vor sich na rolle.

Mit zärdliche Finger wiehlt

de laue Sommerwin’

em schüddere Reschthoor

un weit un broit

koi oinziche Schnoog!

Newwer mir drebbld lächelnd

mei Vanilleis-Göttin.

Was laaft?

Komm, fahre mer hinnere

en de Rheiwal’,

Liparol-Film gugge.

So, des muss for heit widder lange.

Adschee bis zum nägschde mol sagt de

Roland

Im Buch des Lebens

Ihr liewe Leit, heit hab ich in de Zeidung g’lese dass de Bernhard Lott gschdorwe isch. Obwohl er anscheinend lang schwer krank gwest isch, war die Nachricht für mich doch üwerraschend. Ich hab ihn selwer mehrfach erlebt bei verschiedene Mundartpreisverleihunge wo mir zsamme uf de Bühn ware un a bei dem Gedenkowed für de Rudolf Stähle, der für mich persönlich en großer Aschdoß zu meinere Mundartdichtung war. Der Bernhard Lott war en feiner Mensch, feinsinnich mit eme ganz oigene, funkelnde Humor, immer treffend awer nie verletzend. Er werd uns in de badische Mundart-Szene, üwerhaupt in de badische Literatur-Szene, fehle. Zum Gedenke setze do noch e Gedicht von em rei, wo ich von seinere Internet-Seit „http://www.bernhard-lott.de/“ runner gholt heb. Dort gibt’s a für Interessierte noch nähere Informatione üwer sei Lewe un sei Werk.

Im Buch des Lebens

 

Alles

ist verzeichnet

im Buch des Lebens

vorher bestimmt sind

von Ewigkeit her

 

die Wege

auf denen du gehst

die Menschen

denen du begegnest

die Zahl deiner Tage

die Nächte voll Liebe

und die voll Einsamkeit

deine Träume und deine Sehnsüchte

 

Nichts

auf Erden

ist ohne Bedeutung

 

Wie jedes Steinchen

unter den vielen anderen eines Mosaiks

seinen Platz hat

so ist wichtig

jeder Herzschlag

jeder Augenblick

jede Begegnung

 

Und sage nie

Ich bin unwichtig

Der Tropfen Wasser im Meer

sage das nicht

und auch nicht

das Sandkorn in der Wüste

 

Das Blatt am Baume

sage das nicht

und auch nicht

die Wolke am Himmel

 

Denn ohne dich

fehlte

der Erde der Faden

der sie mit dem Himmel verbindet

 

Ohne deine Träume und deine Tränen

ohne dein Lachen und deine Sehnsucht

wäre sie ärmer

wie der Garten

dem fehlt eine Blume

und der Himmel

dem fehlt ein Stern

 

(Bernhard Heinrich Lott)

Schbargelzeit

Jetzt isch se widder do, die schöne Schbargelzeit. Uf de Ägger im Umland sieht mer üwerahl d Leit in gebückter Haldung Richdung Oschde (des isch do, wo die Moischde vonene a herkomme, quasi als „die Weiße’ ausem Morge’land“) Löcher in de Bodde grawe un die arme, u’schuldich weiße Schbargle gnade’los abschdeche. Die U’tat werd awer net vor Gericht verhandelt sondern als Gericht vor die Feinschmecker im Land uf de Disch gschdellt. Die Variande sin’ vielfäldich –sei’s als, Supp, Salat odder Beilag zu Pfannekuche mit Holländersoß, Kottlett mit neie Grombiere, Schinke, Lachs odder was es sonscht noch alles gebt, gedünschdet, gebrode odder gegrillt- awer des Urdoil isch immer oischdimmich: „Delikat!“

 

Die Schbargle nennt mer jo a des „königliche Gemüse“, desszweg muss, wemmer e Gedicht drüwer mache will, des Gedicht entschbrechend sei. Un was oignet sich do besser als e Ode!

 

Schbargle schmecke prima,

Schbargle sin g’sund.

Do griegsch bei unserm Klima

uffs Kilo zwoi Pfund.

(also, wie der sehet, de Vierzeiler isch’s net!)

 

O Schbargel (Ode an de Schbargel)

 

O Schbargel!

Der Gemüse edelschtes,

weißes Gold der Hardt,

der du des ganze Frühjohr

mit göttlichem Glanz üwerschdrahlsch,

wie immer a des Wedder vorher war,

sei uns willkomme!

Hat dich net unser himmlischer Vadder,

sellemols, bei de Vertreiwung ausem Paradies,

dem Adam mitgewe

als Zoiche der Versöhnung,

als innerliche Verhoißung an all die

Herrlichkoide,

wo dermaloinscht uf uns warde,

wenn mir zwische Frohlocke’

un Halleluja-Singe

uns an sein Disch setze derfe

unner blühende Apfel- un Pflaume-Beem,

ewich.

 

Siehsch, Schbargel,

sag selwer,

wie kann mer annerscht,

als vor dir zu kniee,

in Demut dich zu ernde,

un in Verzückung verzehre.

 

Amen (äh, des soll hoiße: Gude Abbedid)

 

wünscht eich

de Roland

Hoilicher Bim Bam

Am Oschdersonndag (23.03.2008) morjeds um halwer zehne isch in Neureut-Kirchfeld Glocke-Weihe. Do werre die neie Glocke in eme Feschtgottesdienscht ihrer Beschdimmung üwergewwe. Anschließend gebt’s noch en Empfang im „Blaue Saal“. De Martin un ich sin mit unserm ganze Schauschbieler-Ensemble vom Kerchechor Nord a ei’glade, weil mir mit de Ei’nahme von unsere Theaderschdücklen „De schwarze Peter“ (2006) un „De Goldkeffer im Geldkoffer“ (2007) a e paar Euros zum Schbende-Ufkomme beigetrage hen. Do kommt jetzt demnägscht noch emol e bissle was dezu, wenn mir unser neies Schdück „’s Erbdande-Drama“ am 14. März für die neie Glocke gschbielt hen. Am 15. un 16. März schbiele mers dann noch emol für die Jugend- un Seniore-Arboit in de Gemoinde Neureut-Nord. Die Oinzelhoide könne der jo alle a grad weider unne noochlese.

Awer was e oigentlich sage wollt: Für die Glocke-Weihe, reschbekdive die Ankunft von de Glocke am Samschdag, de 8. März hat die Frau Pfarrer Müller-Krabbe de Martin un mich gfrogt,ob mir do net e Gedichtle dezu mache könnde un bei de A’kunft von de Glocke vortrage. Des soll dann a schbäter in die Glocke-Feschtschrift nei komme. So ebbes isch für uns nadierlich Ehre’sach. Mir hen uns glei na’gsetzt un des isch debei raus komme:

Die Glocke’ von Kirchfeld
(Gedanken zur Ankunft der neuen Glocken)

Weit soll erschalle’ der Ruf der neie Glocke’,
um die Kirchfelder alle aus ihre Heiser zu locke’.
Ob Groß odder Kloi, ’s kann jeder komme
der ihren klangvolle Ruf hat vernomme.
In der Kinnerschees des Kloine, ’s kann no net laafe,
do ruft’s die Taufglock’ schon zum Daafe.

Johre schbäter, am End’ von de Kinnerzeit,
wenn im Friehling d’ Sonn scheint, isch es so weit:
Vom Turm erschallt die Lutherglock’ feschtlich un froh
un die ganze Gemoinde woiß, warum un wieso.
Was sagt uns der fröhliche Glocke’ton?
Die Jugend erscheint heut’ zur Konfirmation.

Des isch en neier Abschnitt im Lewe,
mer beginnt, nach ernschtere Ziele zu schtrewe,
sucht Herausforderunge’, dene’ mer sich schdellt,
behaupt’ sein’ Schtandpunkt un Platz in de Welt.
Mer will, im chrischtliche Glaube’ wohl g’schtärkt,
erwachse werre, un von de Ält’re bemerkt.

Die Zeit geht fort, mer lernt ebber kenne’
un will sich sei’ Leb’dag nemmeh von’em trenne.
Schließlich schteht mer Hand in Hand vorm Altar,
sagt „ja“ zu’enanner wie’s immer schon war,
mer heert Geige’ im Himmel un die Heimatglock’ klinge
wenn die Leit in de Kerch bei de Hochzich singe.

Johraus un johrein rufe hell und klar
die Glocke vom Turm die ganz’ Chrischdeschar
jeden Sonndag un Feierdag mit ihrem Geläut
zum Gottesdienscht wie schon seit uralter Zeit,
auf dass Gottes Wort und sein hoilicher Sege’
uns begloide durch d’ Woch uff allene Wege.

Für jeden von uns kommt mol die letschde Schtund’,
wo mir abg’rufe werre vom Erderund.
Hasch du dann Gottes Ruf vernomme
un wersch in seine Gnade uffgenomme,
geloitet dich als letschder Gruß vom Turm herab
des Betglock’-Läute in dei kühles Grab.

So soll Tauf-, Luther-, Heimat- un Betglockeläute’
künftich die Mensche’ in Kirchfeld begleite’
durch e langes und freudvolles Erde’lewe
bis se zu Gottes ewichem Friede schtrewe’.
Dort heere se dann widder helles Glocke’klinge’
un derfe mit allene Engel ’s Halleluja singe’.

So, des war’s widder. Vielleicht sieht mer sich jo bei de Glocke-Weihe odder a schon vorher beim Theader-Schdückle. Mir würde uns uf jeden Fall froie.

Adschee un

en scheener Gruß

vom Roland

Frühling im Januar

Dag a liewe Leit, do melde me mol widder. Isch des e Wedder alleweil, ha. Mer könnt faschd moine, de Frühling brecht aus. Do hewe mer so mei Gedanke g’macht, weile doch a s letscht mol for des mol widder e Gedichtle verschbroche heb. Jetzt isch’s halt e Gedicht ohne „le“ worre un im Schtil un vom Thema her hewe’s versucht quasi als „Büttered’ zu geschdalde. Fasenacht isch jo a bal’ widder un des Thema, um des wo’s in meim Gedicht geht, kanne net annerscht behandle sonscht kriege vielleicht noch en Zorn un des isch jo a net needich, odder?

Die Welt isch aus de Fuge’, wo d’ naus una guggsch, klemmt’s:

Der Frühling kommt dies Johr im Januar

so früh, wie noch gar nie en Frühling war.

Ob’s an de Erderwärmung liegt,

am Golfschdrom odder am Mond?

Mer woiß es net, uf jeden Fall

ischs Wedder annerscht wie g’wohnt.

Die Händschich bleiwe dehoim im Schrank

Un Schnee schibble brauchsch a nemmeh, Gottseidank.

Die Winderroife kann hawwe wer will

un de Dürschlossenteiser fliegt en de Sondermüll.

Du kannsch der Hekdolidder deiers Hoizöl schbare

un brauchsch em Urlaub nemmeh nach Idalje fahre.

Mit oim Wort: Die Erwärmung vom Klima

isch so g’sehe für uns Neereder prima.

Wobei, wenn mer’s nüchdern un richdich betracht,

gebt’s do scho Oiniges, wo oim schdutzich macht,

wenn mer de Blick net bloß uf Neeret beschränkt

sondern a mol üwer de oigene Dellerrand denkt:

Do schmelze die Gletscher un krache Lawine,

do wirble die Schdürm un wand’re die Düne,

die Wüschde werre größer wo nix wachst un gedeiht

un annerschtwo regerts defor die ganz’ Zeit.

Ganze Dörfer un Schdädt werre vom Schlamm verschluckt,

wenn Berg afange rutsche, weil en Vulkan widder schbuckt.

Üwerahl uf de Welt gebt’s Kadaschdrophe un Not

un unser Klima werd vom Ozonloch bedroht.

Wegerm Schadschdoffausschdoß solle Audos net fahre

odder zumindescht sollt mer unnödichs Rumfahre schbare.

Un do komme e paar Herre uf die glorreich’ Idee

Im Rhei’hafe müsst noch e Kraftwerk entschdeh,

mit Kohle wo net ruße un die Luft net verpeschde,

nach ihrem Gutachde wär des für d’ Umwelt des Beschde.

Des wär so sauwer, Philippsburg isch en Dreck degege,

do bräucht net mol de Kami’feger komme zum Fege.

Awer ich sag’s eich, was die sich denke, die Herre:

Die moine, des werd doch so schlimm gar net werre

un von denne Neereder un Daxlanner un Knielinger Leit,

die jo dann lewe müsse mit dem Mief die ganz Zeit,

do beschwert sich jo doch bloß en kloiner Haufe

un de Rescht werd de Dreck aus de Luft scho wegschnaufe!

Do fahr doch de elendich Deihenker dezwische –

Ich hoff bloß, desmol hen sich do gedische!!

So, des war’s widder for heit. Halded eich dapfer bis zum nägschde mol.

Adschee sagt eich

de Roland

PS: Wenn der net alle Ausdrück verschdehnt, wo in dem Gedicht owe dra vorkomme, schreiwet oifach, dann wer’ ich mei Kompendium entschbrechend erweidere.

Fladdiere (Neereder Kompendium, Doil 16) – un e neie CD

Dag a. Wie verschbroche gebt’s jetzt erscht emol e neies Wort für unser Kompendium: „fladdiere“. Des isch e zwischemenschlich weit verbroidede Üwung. Die Männer mache’s gern bei de Fraue (vielleicht net grad bei de oigene) , die Unnergewene bei ihre Chefs un die Politiker bei de Wähler (vor de Wahle!), moischdens mit eme Hinnergedanke debei, weil mer gern was von dem odder der jeweiliche Betreffende hätt. Dann duht mer’m halt e bissle schee un gehtem um de Bart, weil mer moint, dass mer so am Beschde zu seim Ziel kommt. Un des nennt de Neereder „fladdiere“. Wenn me net alles deischt, kommt des ausem Franzeesische un mir hens wahrscheins von unsere Brieder un Schweschdere ausem Welsche (Neureut-Süd) üwernomme.

Zwoider Punkt: Unser neie CD isch ferdich un kann ab sofort bschdellt werre. Bezugsquelle unner Punkt „Lernmaterial (Hausaufgaben“). Ich find, sie isch uns widder gut g’lunge un mer kriegt schon e bissle was mit von derre Atmosphäre am 3. November im Neereder Gemoindehaus. Wie oigentlich unser Beschdrewe immer isch, hawe mer a desmol versucht, mit unsere G’schichtlen un Gedichte de Nachweis zu erbringe, dass mer sich net nur in hochdeitsch ernschthaft un mit A’schbruch ausdrücke kann, wobei nadierlich der Humor a net zu korz kommt. Des isch jo der Grundton, wo bei allene unsre Arboide dorchschimmert.

Un jetzt noch als drittes un ledschdes (for heit) e kloins Feschddags-Gedichtle:

 Wie riecht Weihnachde?

(beischbielsweis uf’m Chrischtkindles-Markt)

Bevor die Weihnachtszeit mir lowe

mache mir die „Schnupperbrowe“:

Glühwei’dunscht un Anisduft

doilt sich mit Brotworschtgruch die Luft,

dezwische riecht mer Sauerkraut,

de Knowlich meldt sich ziemlich laut

un mischt sich unners Potpurri

mit Sandelholz un Patschuli.

Orasche riecht mer intensiv,

dezu den Menschemenge-Mief

von dausend Leit mit nasse Kiddl

(fascht glaabsch, do wäscht sich bloß e Drittel).

Kerze’duft von Bienewachs,

Heringsweck un Räucherlachs,

frisches Holz un alde Lumbe,

Pfeifeduwak, Qualm von Schdumbe.

Uf oimol schdeigt en G’ruch in d’ Nas’,

grad denksch der noch: „des riecht nach Gas“

un blötzlich schblitterds, knallts un kracht,

en Feierball schdeigt hoch en d’ Nacht,

’s riecht nach vergluste Tannenoodle

un scho hört mer d’ Sirene jodle:

Alles haschdet, flucht un rennt:

Advent, Advent, die Bude brennt!

 

Des als kloine Impression vom Karlsruher Weihnachtsmarkt uf’em Europaplatz.

Adschee bis zum nägschde mol

sagt eich

de Roland

Sonnewerwele (Neereder Kompendium, Doil 15)

Alleweil, wenn’s drauße widder so herbschdlich drieb isch, froit mer sich üwer jedes Zipfele, wo mer von de Sonn noch erhasche kann. Die Sonn selwer kann ich eich loider net biede, awer devor en Exkurs (fascht hädde gschriwwe: „Esskurs“) üwer „Sonnewerwele“. So sagt mer in Neeret zum Acker- odder Feldsalat, Rapunzel hoißt er als a odder in Öschdreich sogar „Vogerlsalat“. Bsonners gut hat uns der gschmeckt, wannen unser Mudder gmacht hat zu Grombierekuggle (Kartoffelklösse) – awer net bloß aus Grombiere, do war a noch Mehl mit dren, so en ähnlicher Doig wie bei de „Buweschbitzle“ (Schupfnudeln) – un en Sauerbrode odder e Gulasch mit ere scheene braune sämiche Soß, do laaft mer scho währendem Schreiwe widder s Wasser em Mund zsamme (gell, Martin!).

Bevor der jetzt alle zu gut druf send un bloß noch ans Esse denket, musse eich mit eme kloine Herbschtgedichtle glei widder runner hole:

 Herbscht

Bisses morjeds hell werd dauerts täglich länger.

De Regescherm isch Pflichtprogramm for Wand’rer un Fußgänger.

De Newwel legt sich oim uf’s Gmüt un uf die Audoscheiwe,

mer sieht net wasdse jetzt in de Allee’e dreiwe.

Nauszus geht’s midm Johr un mit so manchem Lewe,

dem mir dann ’s ledschde G’loid zum Gottsagger naus gewe.

Koi Bläddle meh hengd an de Boim.

Dunkl werds im Aldershoim.

Des war’s widder for heit. Odder wie ’s de Udo Wolff von der bekannde deutsche Blues-Band „Das Dritte Ohr“ (http://www.das-dritte-ohr.info/index.html Motto: Wetterfester Blues mit deutschen Texten) am End von ihre Konzerde nach de ledschde Zugab ausdrückt: „Vielen Dank, tschüss und noch ein schönes Rest-Leben“!

In dem Sinn also Adschee bis zum nägschde mol

sagt

de Roland

hannich (Neereder Kompendium, Doil 13)

Um eich des Wörtle richdich erkläre zu könne, müsse mer uns erscht mitnanner e Schtück in die Neereder Vergangehoit zrückversetze. Domols, zu Zeide, bevor die erschde Flüchtling nach Neeret komme sin un ihre Tomade, de Babrika un de Knowlich mitbrocht hen, hat’s in Neeret –so isch’s von de Altvordere verzehlt worre- bloß zwoi Gewürze gewwe: Salz un koi Salz. Un wenn von dem erschde zuviel dren war in de Supp odder in de Hausmacher Worscht, dann hat mer gsagt „au, isch die awer hannich heit“.

Des „hannich“ besagt, dass die betreffende Schbeise schlicht un oifach versalze isch.

Awer des kann a sei positive Aschbekte hawwe. Zum oine kammer draus schließe, dass die Köchin frisch verliebt isch –was an un für sich a immer ebbes Schön’s isch- un zum annere gibt’s en rechde Dorscht, un der isch jo a net zu verachde, wammer gnunk zum Trinke hat.

Uf des na wille jetzt (wie verschbroche) grad noch e kloins Gedichtle her setze, e paar Verslen wo mer zu dem Thema ei’gfalle sin. Des isch so e richdiches Kabinett-Schtückle, un wenn der’s erscht oweds nach de Zehne agugget, isch’s sogar e Schbätlese unner dem Motto: „Es isch nicht gut, dass der Mensch allein sei, wenn er ebbes zu Trinke hat“

Wei’- Weishoide

Wer selwer Wei’ trinkt un Wasser predicht,

der isch for mich erledicht.

Wer awer Wei’ trinkt un mich ei’lade duht,

den finne gut.

Die beschde Gschbräche gebt’s mitunder

bei’me Gläsle Schbätburgunder.

Hen’der von dem dehoim noch e Kist’,

wisse der, was der mache müsst!!!

Adschee bis zum nägschde mol sagt

de Roland

(wo uf eier Ei’ladung wart’)

Mundartfrühschobbe am 30. September

Liewe Leut, jetzt ischs amtlich: De Helmut Eckl hat zugsagt, bei unserm nägschde Mundartfrühschobbe ebbes aus seim neue Buch „Die Liebhaber meiner Geliebten“ zu lese.

Für alle die den Helmut Eckl net kenne hab ich aschließend en korzer Abriss aus seim bisherige Lewe un Schaffe ufgführt (die annere dürfe s nadierlich a lese):

 Helmut Eckl kam am 20.November 1947 selbständig in Wolfersdorf (ehemals Niederbayern) auf die Welt.
Der Vater liebte das Angeln. Die Mutter liebte Liebesromane. Beide liebten Helmut und seine Schwester Roswitha.
Aufgewachsen ist der Helmut Eckl langsam und vorsichtig in der Oberpfalz (Eslarn, Waidhaus, Weiden, Neumarkt).
Seine mittelmäßigen schulischen Leistungen reichten bis zur mittleren Reife.
Danach wurde er Diplom-Verwaltungswirt (FH) und blieb brotberuflich an der Ludwig-Maximilians-Universität München hängen.
Es ist verheiratet und hat zwei eheliche Kinder gezeugt.
Seine Hobbys sind Bücherschreiben und Radlfahren.
Sein Stammtisch hat sich 1976 am Chinesischen Turm gegründet und alle Stammtischbrüder leben noch.
Helmut Eckl ist ein glücklicher Münchner.
Mit der Rolltreppe am Marienplatz fährt er schwindelfrei.
Altersbedingte Ehrungen hat er noch keine erhalten.
Seit dem Jahre 2000 ist er Münchner Turmschreiber.Bisher hat er acht Bücher geschieben:
die Gedichtbände „I hob wos gschriebn“, „schreib no oiwei“, „wenna amoi kummt“, den Roman „Bierblick“, das Kinderbuch „Da Bibe Atzinger“, die biographische Erzählung „Reklamationen zwecklos, bin Niederbayer“, die Satirebände „Mich regt nix auf“ und „Begegnungen in der Mitte der endgültigen Jahre“; ferner hat er die CD „Früher war die Zukunft länger“ veröffentlicht.
Von Helmut Eckl stammen ferner Beiträge für Zeitungen und Zeitschriften, den Kinderfunk, das Fernsehen und für Anthologien.

Und die Presse schreibt:

 „Der Niederbayer Helmut Eckl ist ein Satiriker, wie man sich ihn in Bayern wünscht.“
(Süddeutsche Zeitung)

„Es ist einerlei, aus welchem seiner Bücher Helmut Eckl liest. Der Münchner Autor wird die Lacher immer auf seiner Seite haben.“

(Münchner Merkur)

„Helmut Eckl ist der geborene Satiriker.“
(Bayerischer Rundfunk) 

Leseprobe                                                    Die nachfolgenden Texte sind aus dem neuen Buch „Die Liebhaber meiner Geliebten“
Bestellungen: Künstler Kontakt München 

Die Liebhaber meiner Geliebten

Meine Geliebte hatte zwölf Liebhaber.
Ich bin der Dreizehnte.
Wir haben immer zusammengezählt.
A bisserl spät bin ich als Dreizehnter schon dran.
Aber die Zwölf vor mir waren alle nett.
Sie haben sie mir ganz zurückgelassen:
Alles dran! Traumhaft!
Ich werd amal nix zurücklassen.
Der vierzehnte Liebhaber wird sich eine
Andere suchen müssen!
Ich hab mich geirrt.
Ich muss mir eine Andere suchen.

Liebesfalten

Als die Liebe kam,
hatte ich keine Falten.

Als die Falten kamen,
ging die Liebe.

Hock jetzt ziemlich einfältig da!
Die Liebe hockt auf Faltenlosen.
Auch ziemlich einfältig!

Alle Texte © by Helmut Eckl                                                                        

Mir von de Alt-Neereder Schul hen selbverschdändlich a e paar neie intressande Sache in de Hinnerhand, unner annerem en neier „Er & Sie“ –Sketch!

Un d Renade hat extra widder s Newezimmer hergricht, dass a alle Leit Platz hen wo zuhorche welle. Mir fange um Elfe a un denke, dass mer so schbäteschdens geger halwer Oins durch sin mit unserm Programm.

Un die Hausfraue breichde an dem Dag net emol ubedingt zu koche, weil, wer will, kann anschließend noch zum Middagesse uf de Bazar geh bei de Kerchegemoinde Nord. Wennes recht woiß gebts dort widder de traditionelle Rollbrode mit Grombierekuggle un grienem Salat. Aldernadiev hats a Mauldesche in de Brieh, awer de Salat isch de gleich. Gude Abbedid, kammer do bloß sare.

Awer vorher kommeder zu uns!

Dir sehnd, s isch alles beroit un s gebt koi Entschuldichung for s Fehle. Wer net kommt, isch selwer schuld!!!

Adschee bis dort na sagt eich

de Roland