Theater-Vorverkauf

Dass mer uns recht verschtehn: Es geht net um e Theader, wo do verkaaft werre soll, sondern um die Karde für unser neies Schdückle.

Nochdem die erschde Leit schon wegger Karde noochgfrogt hen, ischs jetzt amtlich: De Vorverkauf für unser Theaterschtück „Koi Kürbis im Krautgarde (awer jede Menge Äktschen)“ isch jetzt offiziell eröffent. Ab sofort gebts Karde für 8,- Euro (Erwachsene) bzw. 5,- Euro (Schüler) an de bekannde Vorverkaafsschdelle: In Eggschdoi bei „Schreibware-Geigle“ un in Neeret bei „Schreibware-Molnar“ im Bäreweg, beim „Musiklädle“ im Zinke, un bei „Schreibware-Schmidt“ in Kirchfeld in de Donauschwabe-Schdrohß. Wer sei Karde im „Schoko-Lädchen“ in de alde Friedrich-Schdrohß kaafe will, muss noch e paar Dag warde, die hen nämlich noch Urlaub bis zum achdezwanzichschde Februar.

So viel erscht mol dodezu. Zum Schdück selwer kanne eich a noch e bissle was verzehle. Wie de Titel scho sagt, schbielt des im Krautgarde, genauer gsagt im Biergarde von dem Kloigärtner-Veroinshoim „Zum griene Daume“. In dem „Ambiende“ bewege sich  en Bankdirektor im Ruheschtand un sein ehemalicher Cheffahrer –jeweils mit Gattin bzw. Dauerverlobter-, wo do unne e Gardeschdückle hen. De oine züchded dort Kürbis un möchte mit seim Riese-Exemplar gern ins Fernsehe un de anner versucht in denne finanziell u’sichere Zeide sei Geld in Kois (des sin so japanische Goldfisch) krisesicher azulege. Dezu kommt noch die Witwe von dem Ehrepräsident von dem Kloigarde-Veroi (dir sehet, in Neeret hat mer’s a net so midem Genitiv), wo do laut Satzung jeden Dag ihre Middagesse umsonscht griegt. Sie heert net so gut, hat awer e blühende Fandasie un verzehlt ihre „Wahrnehmunge“ jedem wo se heere will, odder a net, wie zum Beischbiel dem Wirt, den se jedes mol nervt, weil se schdändich nach ihrem Middagesse frogt. Weils in derre Gschicht a noch en „kriminalischdische“ Aschbekt gibt, hemmer zur Ufklärung noch des „Auge des Gesetzes“, de Hauptwachtmeister Apfelbutz, en ei’gebürgerder Berliner un zu guder Letscht unser Nordlicht, die Trine Beernbaum, wo sich oifach nur froit, dass ihre Levkoje so schee gedeie.

Wenn der jetzt neigierich worre sind, isch gut. Also nix wie los un Karde kaaft, weil dir wisset jo: Wer net kommt ….

Grad so wille mein heidicher Ei’trag awer a net schteh lasse, vielleicht noch en kloiner Vierzeiler aus’em botanische Bereich, des bieded sich bei dem Thema jo a, der noch aus meinere hochdeutsche Phase schdammt. Des Gedichtle hoißt                       „Engerling“                  un geht so:

Es ist -bei Gärtnern- rings im Land

Teils weniger, teils wohlbekannt,

dass manches Blättlein länger hing,

gäb`s nicht den bösen Engerling.

 

Also, in diesem Sinn, en scheener Dag noch un …

mer sieht sich

sagt

de Roland

BNN

Liewe Leit,

hen der heit in de BNN schon den Artikel üwer unser Theaderschdück glese? Der isch uf jeden Fall intressant un lesenswert (schbäter, wemmern mol als Datei hen, werren do im Blog a noch hochlade). Bloß oi kloine Korrekduhr hedde noch a’zubringe. Wenn der jetzt for unser Schdückle e Ei’trittskart kaafe wellet un ganz verzweifelt in Neeret rumrennet un nach em “Museums”-Lädle suchet: So ebbes gebts bei uns (noch) net. Vielleicht wär des jo e A’regung for d Marianne Müller, dass mer so ebbes noch ans Neereder Heimathaus mit a’gliedert. Weil, die vom Freundeskreis “Heimathaus Neureut” könne jo für ihre wichdiche un lobenswerte Tätichkoit a immer finanzielle Unnerschdützung brauche.

Awer widder z’rück zum Thema: Des “Museumslädle” isch schlicht un oifach en Schreibfehler. ‘s handelt sich do ums “Musiklädle” im Zinke un die hen noch Karte un sin froh, wenn se se los bringe.

Also los un nix wie na

sagt

de Roland

’s geht los – pfupferts eich scho?

Liewe Leit,

jetzt ischs amtlich. De offizielle Vorverkauf für unser Theaderschdück „Im Falle eines Falles – dichte mir fascht alles!“ isch seit geschdern eröffent. Ihr könnt eich also jetzt mit Eitrittskarde eidegge, dass der schbäter net vorem volle Gemoindehaussaal widder rumdrehe missed, weils alles ausverkaafd isch. Awer saret dann net, dir heddeds net gwisst.

Die Karde für 8 Euro (Kinner 5 Euro) gebts in Neeret beim Schreibware-Molnar, im Musik-Lädle un im Schoko-Lädchen. In Eggschdoi hat de Schreibware-Geigle den Vorverkauf üwernomme.

Bloß noch emol zur Erinnerung: Jeder Euro un jeder Cent, der an denne drei Theaderdäg (Samschdag, 19. März, Sonndag, 20. März un Samschdag, 26. März) eignomme werd, geht ohne Abzug von irgendwelche Ukoschde direkt an die vorgsehene Schdelle als da wäre: Evang. Kirchegmoinde Neureut Süd, Freundeskreis der Diakonie Neureut un de Kinnergarde Kirchfeldschdrohß in Nord.

Ihr sehet, mer kann also sein Schbass hawe un debei sogar noch ebbes Gudes duh. Also kommet nar alle un bringet a Hunger un Dorscht mit, weils a e bissle was zum Beiße un Schlugge gebt.

Un was des „pfupfere“ a’geht: Des isch widder e neies Wörtle fürs Kompendium (Neereder Kompendium, Doil 29). „Pfupfere“ duhts oim, wanns oim in de Finger juckt, ebbes ganz bschdimmdes zu mache odder sich azuschaffe. Beischbiel: „Also der Käskuche do, der seht net schlecht aus. Der deht me scho pfupfere.“ Odder e Anners:  Unnerhalde sich zwoi Freind. Sagt de Oinde: Na, hasch der jetzt des neie Smart-Phone kaaft?“ Sagt de Anner: „Noi, des war mer dann erscht mol doch noch zu deier. Awer pfupfere duhts me scho!“ Also, jetzt wisse der a, was „pfupfere“ isch (un gleichzeidich a noch, wie die schbarsame Neereder ticke). Un wenns eich pfupfert könne der mer jo mol schreiwe, was der dezu moinet.

Also, adschee – schbädeschdens bis zum Theader

sagt

de Roland

Neier Ei’trag – mit Termine!

Liewe Leit,

gell do gugge der, dass emol widder ebbes Nei’s dohin schdeht. Awer mir geht’s halt so, wie allene Annere a, wo uf oimol nemmeh ins Gschäft müsse. Do moinsch, du hasch en Haufe Zeit for alles Meegliche, kannsch dich endlich emol so richdich kreativ betätiche – Ja, Pfeifedeggl. Wie hemmer als früher gsagt: „De Moiner isch en dummer Kerl.“ Un do isch schon ebbes dra. Weil, do bisch uf oimol in dem komische Klub dren, dem „Dätschmer-Klub“. Do hoißts dann: „Du hasch doch jetzt Zeit, du könntscht mol …“ Un ‘s oind isch nonet ferdich kommt scho die nägschd Ufgab.

Awer irgendwann muss a mol widder Schluss sei, un desszweg hewe denkt, schreiwe jetzt oifach emol widder ebbes en de Blog un nemm mer a ganz feschd vor, koi so lange Pause meh zu mache. Wobei, wenne als ab un zu emol e Rückmeldung von eich do drauße „an den Geräten“ griege deht, will sare, wenn der als oifach emol mei Gschreibsel kommentiered, dasse a merk, dass der eich for des wasse mach intressiered, wär des für mich a e größere Motivation weiderzumache.

In dem Sinn dehde sare, schdrenge mer uns in Zukunft alle e bissle meh a un dann klappts a widder besser. ‘s nägscht mol langts dann a widder for e Gedichtle odder e neies Wörtle for’s Kompendium – vielleicht a for boides. Verschbroche!!

Awer ich möchte jetzt den Ei’trag do net beende, ohne dasse vorher uf unser kommende Termine hi’gwiese heb:

Samschdag, 19. März, Sonndag, 20. März un Samschdag, 26. März geht im Gemoindehaus unser neies Theaderschdück vom Martin un mir üwer d Bühn: „Im Falle eines Falles – dichte mir fascht alles!“. Mit debei isch nadierlich die bewährte Kerchechor-Theatergruppe un die Ei’nahme sin wie immer für soziale Zwecke beschdimmt. Karde gebts im Vorverkauf in Neeret beim Schreibware-Molnar, im Musiklädle un im Schoko-Lädchen, un in Eggschdoi beim Schreibware-Geigle.

Dann hemmer dies Johr a widder unser beliebte Mundart-Frühschobbe. De nägsche isch am Sonndag, 3. April morjeds ab de Elfe bei de Renade in de „Trauwe“ un als Gaschtleserin kommt e bekanntes „Karlsruher Mädle“, die Judith Rimmelspacher.

So, des isch jetzt g’nug für heit. En scheener Sonndag noch wünscht eich

de Roland

Neies von de “Revolution”

So, liewe Leit, heit werre eich de Mund e bissle wässrich mache für unser neies Theaderschdückle, „D‘ Revolution in Neeret“, wo ich midem Martin zsamme gschriwwe heb. Jetzt hemmers scho zwoimol gschbielt, am 6. März Premiere un „Welturaufführung“ un geschdern beim kirchechorinterne Familie-Owed un’s isch jedesmol vom Publikum begoischderd uffgnomme worre.

E korze Inhaltsa’gab: Bei’ere Erdwärmebohrung isch’em Andreas Hofer sei Häusle schwer beschädigt worre. Er verlangt de Widderufbau von de Gemoinde un kampiert mit seim Wohnwarre vor em Roothaus, um seinere Forderung e bissle Nochdruck zu verleihe. De Borjemoischder hat awer ganz annere Plän seit en Berliner Großinveschdor nach Neeret komme isch. Der will do en Freizeitpark über die Badisch‘ Revolution anno 1848 errichde un will dezu dem Andreas sei alts Häusle als „Souvenirshop“. Der isch nadierlich dodrufna sauer un gründt mit seinere Freindin, de Wirtin vom „Grünen Baum“ e Gegenpartei um bei de Borjemoischderwahl a‘zudredde. Em Borjermoischder sei Fraa setzt ihre beschte Freundin uf de Andreas a, um dem die Kandidatur auszurede. E junges Architekdepärle erkennt in dem alde Häusle e Kleinod aus de badische Gründerzeit un entdeckt uf em Schbeicher en alde Koffer mit revolutionäre Schrifde un Tagebiecher, was dem Häusle uf oimol  e gschichtliche Bedeutung gebt. Nachdem sich a noch rausschdellt, dass un in wellere Weise en Urahn von dem Berliner Inveschtor in die damaliche Vorgäng verwickelt war, kommt alles ganz annerscht wie sich die Betoilichde des urschbrünglich denkt hen.

Len Se sich üwerrasche. Komme Se, lache Se und duhn Se debei noch ebbes Gutes. De Reinerlös von denne Veraschdaldunge werd widder komplett für gemoinnütziche Zwecke zur Verfügung gschdellt.

Die nägschde (un ledschde) Termine sin

• heit, Sonntag, 14. März 2010, 17.00 Uhr, (em Fümfe, ‘s gebt a Kaffee un Kuche),
• am Samstag, 21. März 2010, 19.00 Uhr (also em Siwwene) un zum letschde mol
• am Sonntag, 22. März 2010, 17.00 Uhr (a widder em Fümfe mit Kaffee un Kuche).

Saalöffnung isch immer e Schdunn bevor‘s Theader los geht.

Karde zu 7 Euro (Erwachsene) bzw. 4 Euro (Kinder) sin im Vorverkauf in Neeret bei Schreibwaren Molnar, Schreibwaren Kastner, Musiklädle Neureut, un in Eggsschdoi bei Schreibwaren Geigle odder a an de „Owed-Kass“ erhältlich.

So, jetzt noch e Bild von de Ufführung geschdern

und vielleicht sehe mer uns jo an oim von denne Termine.

En scheene Sonndag noch sagt

de Roland

D’ Revolution in Neeret

Liewe Leit,

heit gebt’s widder e paar Termine zum Uffschreiwe un Vormerke. Wie dir jo wisset, schreiwe de Martin un ich scho seit üwer fuffzeh Johr Theaderschdücklen, wo mir mit de Theadergrupp vom Kerchechor eischdudiere un dann a ufführe.

Unser diesjähriches Schdück hoißt „D’ Revolution in Neeret“ (ein Revolutionsstück in 3 Aufzügen vor einem Wohnwagen). Es isch e Reminiszenz an die Badisch’ Revolution von 1848/49 mit völlich neue, von de Hischdoriker bisher noch viel zu wenich beachdede Aschbekte un werd, nadierlich wie jedesmol bei uns für en gude Zweck, an de folgende Termine im Gemoindehaus Nord gschbielt:

• Samschdag, 6. März (Premiere un Welt-Uraufführung),
• Sonndag, 14. März,
• Samschdag, 20. März
• Sonndag, 21, März.

Gschbielt werd Samschdags immer em Siwwene (19.00 Uhr) un Sonndags em Fümfe (17.00 Uhr). Saalöffnung (mit Bewirdung) isch jeweils e Schdunn vorher un wahrscheinlich gebts an de Sonndäg a Kaffee un selwergebackener Kuche.

Die Eitrittskarde koschde wie letschtes Johr siwwe Euro (7,00 €) un werre in Neeret bei de Frau Kastner (Schreibwaren, Alte Friedrichstraße), beim Schreibwaren-Molnar im Bärenweg odder im Musiklädle, Neureuter Hauptstraße im Zinken un in Eggschdoi beim Schreibwaren-Geigle verkaaft. Wer sich so früh noch net feschtlege will, kann die Karde a, so lang de Vorrat reicht, an de Obendkass griege.

Üwer de Inhalt schreiwe dann beim nächschde Mol e bissle was.

Jetzt möchde bloß noch uf unsern nächschde Mundart-Frühschobbe hi’weise, am Sonndag, 28. März um Elfe in Neeret im Löwe, unner Annerem mit dem Mundart-Liedermacher un Preisträger Thomas Meyer aus Karlsruh’. Do isch de Ei’tritt wie immer frei.

 Also, ich hoff, mer sieht sich.

Adschee bis dort na sagt

de Roland

So e Theader

Hallo ihr liewe Leit, ich hoff dir kennet mich noch, weil’s jetzt doch schon e ganze Weile her isch, dasse me s’ ledschd mol gmeldt heb, awer bei uns isch zwischezeitlich oiniches  ab’gange.  Z’erscht hat de Computer gschbonne, des hoißt, die Feschtblatt hat sich verabschiedt un s’ isch nix meh gange. Gottseidank heb ich beizeide uf den gude Rat von meim alde Kumbl Dietmar g’hört un mir e externe Feschblatt zuglegt, wo e alle mei Date uf Nummer sicher abgschbeichert heb. So war zwar der Computer em A..aimer, awer mei Date sin g’rettet un des isch die Hauptsach. Mittlerweile hewe jetzt e nagelnei’s Gerät do schteh vom Arlt in Karlsruh (gewisse Wardezeide musch en Kauf nemme, awer d Beradung war super!!) mit eme 22-Zoll-widescreen Bildschirm, des isch e ganz neies Neiguck-Gfiehl un s Schaffe geht a widder; awer erscht nachdem isch mir noch e Grippe-Auszeit gnomme ghat heb woe oigentlich zu gar nix Luscht ghat heb, awer a des isch vorbei gange un so kanne heit widder do hogge un en elendslange Tegscht uf de neie Taschdadur -die war halt em Paket debei- in de Blog klopfe.

Üwrichens, am ledschde Sonndag hen mir die erschde öffentliche Ufführung von unserm “Wiesengrund” vor vollem Haus mit ewe solchem Erfolg üwer d Bühn gebrocht un wer’s jetzt noch sehe will, muss sich beeile. Mir schbieles nämlich bloß noch am Samschdag, 14. März um Siwwene un Sonndag, 15. März um Fümfe im Gemoindehaus Nord. Reschtkarde gebts noch an de Owedkass awer so wie’s aussieht, werd an denne zwoi Däg a widder voll werre. Am ledschde Sonndag war a noch en Reporter von de BNN do un hat üwer unser Schtückle bericht. Der Artikel isch geschdern, am Dienschdag, erschiene un isch em Große un Ganze doch recht positiv. For die wo koi BNN hen, du e den Artikel grad do unne noch dezu henge.

Des langt for heit, ich muss jetzt nämlich noch fort en d Theaderprob, weil mir uns jo uf unsere Lorbeere net ausruhge welle un sag desszweg

Adschee

bis zum nägschde mol

09_03_10-kritik-bnn-wiesengrund1

Wiesengrund

Liewe Leit,
„im schönschten Wiesengrunde …”, do duht sich ebbes: „Wiesengrund” isch nämlich de Titel von unserm neie Theaderschdück, „eine Idylle in drei Aufzügen mit einem Aufzug”. De Martin un ich hens mitnanner gschriwwe (unner Vernichdung oinicher Flasche Rotwei aus diverse Lage) un mir schbiele nadierlich a selwer widder mit, wenn des dann demnägscht üwwer d Bühn geht.
Mir schbiele widder im Gemoindehaus Nord in de Kirchfeldschdrohß 149 un zwar am Sonndag, 8. März um Fümfe (17.00 Uhr), am Samschdag, 14. März um Siwwene (19.00 Uhr) un noch emol am Sonndag, 15. März um Fümfe (17.00 Uhr). Saalöffnung isch jeweils e Schdunn vorher.
Karde gebts an de Owed-Kass, falls noch e paar üwrich sei sollde, awer sicherer ischs em Vorverkauf; wie immer in Neeret bei de Frau Kastner in de Alde Friedrichschdrohß, bei Schreibware-Molnar im Bäre’weg odder beim Musik-Lädle im „Zinke” un in Eggschdoi beim Schreibware-Geigle in de Hauptschdrohß.
Vorbschdellunge üwer den Blog odder per E-Mail werre nadierlich a gern a’gnomme.
Die Karde koschde wie ledschd Johr a siwwe Euro für Erwachsene un fünf Euro für Kinner. Der Erlös geht widder ohne Abzug in die Jugend- un Seniorearboit von de Kerche-Gmoinde
Die Prowe laafe ganz gut -wegger derre Proberei hawwe in de ledschde Zeit a nemmeh so an dem Blog weiderschreiwe könne, awwer des macht sich alles widder- un wenn dir in de Ufführung halwer so viel lachet wie mir bei de Prowe, nord werds recht.
Üwer de Inhalt verzehle eich e anners mol e bissle meh, jetzt nur so viel: De namensgebende „Wiesengrund” isch eine neu eröffnete „Senioren-Residenz” im Zinke un die Bewohner un Mitarwoider dort hens alle fauschtdick hinner de Ohre. Mir entführe eich in dem Schtück uf die högschde Himalaya-Gipfel in das Reich des Yeti un ins diefschde Bermuda-Dreieck, wo die Gehoimnisse um de Pirade-Schatz vom Käptn Schwarzbart enthüllt werre.
Also, kommed nomme. Zum Esse un Trinke gebts a widder ebbes, wobei die Küche awwer wegger de Kerche-Renovierung un der desszweg eigschränkte Nutzung vom Gemoindehaus kalt bleiwe muss.

Uf eier zahlreiches Erscheine froit sich

de Roland

Münchner Bilderbogen

Wie verschbroche wille eich heit e paar Bilder von unserm Münchner Gaschtschbiel im „Fraunhofer”- Theater präsendiere. Zu unserm Gaschtschbiel selwer isch zu sare, dass unser Tegschde -un nadierlich a em Simon sei Taschdekünschde- erschdaunlich gut ufgnomme worre sin. Manchmol hen die Leit zwar erscht mit e bissle Verzögerung reagiert, awer des isch durchaus in Ordnung so. Nachdem de Helmut (Eckl) un die Evelyn (Huber) de Frühschobbe mit Wort un Musik eröffnet ghat hen, hat noch als Üwerraschungsgascht die Valerie McCleary ebbes Irischs gsunge un dann ware mir dra bis zu de Weißworschtpaus em Zwelfe. Aschließend hen die drei „Münchner” (de Helmut kommt aus Niederbayern, die Evelyn aus Oberbayern un die Valerie aus Nordirland) weidergmacht, bevor mir dann widder ins Geschehe eigegriffe hen. Insgsamt hemmer so ugfähr e gude Schdunn Zeit ghat um unser Sache vorzuschdelle. De Leit hats offesichtlich gfalle un em Helmut a, denn er hat gsagt, dass mer gern mol widder komme derfe.

Loider war jo von eich koiner in München debei un am ledschde Sonndag ware a net alle bei unserm Frühschobbe im „Löwe”, obwohls do a voll war, awer dir hend noch e Chance: Jetzt am Sonndag hen mir im katholische Kinnergarde St. Heinrich & Kunigunde in Kirchfeld, in de Moldauschdrohß 16 e Benefiz-Veraschdaldung zugunschde vom Kinnergarde-Neibau. Musikalisch duht uns do de Rudi Banghard unnerschdütze un des werd bschdimmt a ganz toll. Also, des isch doch e Agebot. Nix wie nagange un sich wohl gfiehlt.
Übrichens: Wer net kommt, isch selwer schuld,
sagt de Roland

So, un jetzt die Bilder:

‘s Erbe von de Erb-Dande

Im Neereder “Online-Bläddle” isch jetzt en Artiggl veröffentlicht worre üwer die Schbende-Üwergab vom Erlös von unsere Theater-Aufführunge am 14., 15. un 16. März 2008. Für die wo’s int’ressiert heb ichen do unne dra verlinkt.

Es ware üwer 3.600 Euro wo elloi an Ei’trittsgelder ei’gschbielt worre sin an denne drei Däg. Des isch dann zsamme mit dem was an Bewirdunge mit Schbeise un Getränke erwirtschafded worre isch, in drei Doil ufgedoild worre (oin Doil für die Kirchfelder Glocke, oin Doil für die Jugendarboid in Nord un oin Doil für de Freundeskreis der Diakonie -also für die Alde).

http://www.neureut.de/inhalt/aktuell_detail.php?holen=747

Bilder sin bei de Üwergab’ a gmacht worre. So wie e se grieg, wer e se a do rei schdelle.

Es war en scheener Nochmiddag für uns, alle hen sich noch emol bedankt un hoffe druf, dass uns für nägscht Johr widder ebbes Nei’s ei’fallt.

Übrigens: Die Alt-Neereder Schul werd sich a beim “Jahresfest” von de Hardtstiftung zoige un am Sonndag, 22. Juni ab de halwer fünfe im Café dort e paar Sache un Sächelen aus ihrem “Oeuvre” vorschdelle. A dodezu sin alle herzlich eig’lade (zum Esse un Trinke gebt’s nadierlich a ebbes).

Adschee bis dort na

sagt

de Roland